Անցած գիշեր Իսրայելի օդուժը գրոհել է Իրանի մայրաքաղաք Թեհրանը, Խուժիստան և Իլամ նահանգները: Իսլամական հանրապետության ԶՈՒ ՀՕՊ ուժերի հրամանատարության տարածած տեղեկատվության համաձայն՝ ինտեգրված հակաօդային պաշտպանության համակարգի շնորհիվ գրոհը հաջողությամբ կասեցվել է, որոշ տեղերում սահմանափակ վնաս է հասցվել, միջադեպի ծավալները հետաքննվում են:
Գիշերային հարձակման մասին Իսրայելի Պաշտպանության բանակը հայտնել է, որ այն իրականացել է երեք փուլով, ավելի քան քսան թիրախ խոցվել է, բոլոր գրոհային ինքնաթիռները վերադարձել են հենակայաններ:
Միջազգային լրատվամիջոցները գրում են, որ Իրանի միջուկային օբյեկտները և նավթային ենթակառուցվածքները չեն թիրախավորվել: Ըստ իսրայելական բանակին մոտ կանգնած աղբյուրների՝ օդուժը հարվածներ է հասցրել հրթիռների և ԱԹՍ-ների արտադրության կենտրոններին, մի քանի զինապահեստների:
Իսրայելի պաշտպանության բանակը տեղական ժամանակով 06:00-ին հայտարարել է, որ ռազմագործողությունն ավարտված է, բայց եթե Իրանը ճակատագրական սխալ թույլ տա, ապա գործի կդրվեն բոլոր հնարավորությունները. «Մենք գիտենք հարձակվել և նաև պաշտպանվել»: ԱՄՆ Ազգային անվտանգության խորհրդի ներկայացուցիչ Քիրբին Իսրայելի գործողությունները գնահատել է «ինքնապաշտպանություն»:
Որոշ աղբյուրներ հայտնում են, որ Իսրայելը հարվածներ է հասցրել նաև Իրաքի և Սիրիայի ՀՕՊ համակարգերին և «կուրացրել Իրանին»:
Իրանի դեմ բոլոր գործողությունները, ինչպես իսրայելական մամուլն է փոխանցում, քննարկվել և համաձայնեցվել են ԱՄՆ վարչակազմի և Պենտագոնի հետ: Գրոհից ժամեր առաջ ԱՄՆ-ն Գերմանիայի հենակայաններից Մերձավոր Արևելք F-16 կործանիչների մի քանի էսկադրիլիա է տեղափոխել: Պաշտոնապես ասվել է, որ այդպիսով աջակցություն է ցուցաբերվում Իսրայելի ինքնապաշտպանությանը:
Ռազմական գործողություններին, անշուշտ, նախորդել է ԱՄՆ-Իսրայել քաղաքական համաձայնությունը: Այդ մասին հոկտեմբերի 25-ի ուշ երեկոյան ակնարկել է Թուրքիայի արտաքին գործերի նախարարությունը՝ սոցիալական X հարթակի գրառումով, որտեղ տարածաշրջանում խաղաղության և կայունության խոչընդոտ է ճանաչված «Նաթանյահուն՝ իր ռազմական կաբինետով»: Թուրքիայի ԱԳՆ գնահատել է, որ ԱՄՆ վարչակազմը լիովին գտնվում է Նաթանյահուի ազդեցության տակ:
Իսրայելն Իրանին հարվածել է Կազանում ԲՐԻԿՍ-ի գագաթաժողովից մեկ օր անց, որտեղ Իսլամական հանրապետության նախագահը բանակցություններ է վարել Ռուսաստանի և Չինաստանի առաջնորդների հետ. Միջազգային մի շարք լրատվամիջոցներ այդ գագաթաժողովը համարել են նոր աշխարհակարգի ձևավորման մեկնակետ:
Այս առումով Իրանին Իսրայելի կողմից «նախազգուշական հարվածներով» ԱՄՆ շահագրգռվածությունը լիովին հասկանալի է. հրեական պետությունը օդ է բարձրացրել մոտ հարյուր գրոհային ինքնաթիռ, ոչ մի կորուստ չի ունեցել և «բացահայտել, որ անգամ Թեհրանում հրթիռային գրոհից նախնական նախազգուշացման համակարգ չի գործում»: Պարզ է, որ Վաշինգտոնից Իրանին հասկացնում են, որ ԲՐԻԿՍ-ին անդամակցությունը ո՛չ քաղաքական, ո՛չ ուղղակի ռազմական առումով անվտանգային երաշխիք չէ:
Բայց հոկտեմբերի 26-ի իսրայելական գիշերային «վրիժառությունը» նախորդում է Կատարում ՀԱՄԱՍ-ի հետ բանակցությունների «օրակարգ ճշտելու հարցով» ԱՄՆ, Եգիպտոսի և Իսրայելի հատուկ ծառայությունների ղեկավարների հանդիպմանը, որի կազմակերպման համար մեծագույն ջանքեր հենց Վաշինգտոնն է գործադրել: Իրանին հասցված «նախազգուշական» հարվածները ՀԱՄԱՍ-ին և «Հեզբոլլային» հասկացնում են, որ հովանավոր երկիրը «չափազանց խոցելի՞ է»: Իսրայելական հարվածից մեկ օր առաջ Սպիտակ տունը բացահայտել է, որ Թեհրանին զգուշացրել է, որպեսզի «պատասխան գործողություններ չձեռնարկի»: Իրանին Իսրայելի հասցրած հարվածը մերձավորարևելյան դրամայի վերջին արա՞րն է, թե՞ մեծ ողբերգության նախերգանքը:
