Կոլումբիայի նախագահ Գուստավո Պետրոն հայտարարել է Իսրայելի հետ դիվանագիտական հարաբերությունները խզելու մասին՝ նրա կառավարությանը մեղադրելով պաղեստինցիների «ցեղասպանության» մեջ։ Այդ մասին գրում է Deutsche Welle-ի ռուսական ծառայությունը:
Ըստ հրապարակման՝ Բոգոտայում Աշխատանքի միջազգային օրվա կապակցությամբ ունեցած ելույթում Պետրոն նշել է, որ եթե Պաղեստինի ժողովուրդը կործանվի, կկորչի նաև ողջ մարդկությունը:
Նա հավելել է, որ Իսրայելի հետ հարաբերությունները կխզվեն մայիսի 2-ին։
Կոլումբիայի արտգործնախարարությունն իր հերթին հայտարարել է, որ դիվանագիտական անձնակազմը կվերադառնա հայրենիք՝ Գազայի հատվածում Իսրայելի ռազմական գործողությունների պատճառով։ Իսրայելում և Պաղեստինում Կոլումբիայի քաղաքացիները համապատասխան ծառայությունները կստանան Թել Ավիվում գտնվող հյուպատոսական բաժնից։
Իսրայելի իշխանությունները խստորեն դատապարտել են Կոլումբիայի նախագահի հայտարարությունները։ Իսրայելի արտգործնախարար Իսրայել Կացը Գուստավո Պետրոյին անվանել է «հակասեմիտ», որը խոստացել է «պարգևատրել ՀԱՄԱՍ-ի մարդասպաններին և բռնարարներին»։
