Պաղեստինյան ՀԱՄԱՍ արմատական շարժման ներկայացուցիչները Կատարում անցկացված բանակցություններում մերժել են փոխզիջումային առաջարկը, Իսրայելը մտադիր է շարունակել մարտական գործողությունները Գազայի հատվածում։ Այս մասին ասված է Իսրայելի վարչապետ Բենիամին Նեթանյահուի գրասենյակի հայտարարության մեջ։
«ՀԱՄԱՍ-ը հրաժարվել է ամերիկյան փոխզիջումային բոլոր առաջարկներից, ինչպես նաև ողջունել ՄԱԿ-ի Անվտանգության խորհրդի որոշումը: Իսրայելը չի ենթարկվի ՀԱՄԱՍ-ի ցնորական պահանջներին և կշարունակի գործել` հասնելու պատերազմի բոլոր նպատակներին` ոչնչացնել ՀԱՄԱՍ-ի ռազմական ու վարչական ներուժը, ազատ արձակել բոլոր պատանդներին և երաշխավորել, որ Գազան ապագայում այլևս սպառնալիք չներկայացնի Իսրայելի համար», – ասվում է հայտարարության տեքստում։
Ըստ Նեթանյահուի գրասենյակի՝ ՀԱՄԱՍ-ն ԱՄՆ-ի առաջարկը մերժել է՝ պահանջելով պատերազմի անհապաղ դադարեցում, Գազայի հատվածից Իսրայելի պաշտպանության բանակի ամբողջական դուրսբերում և անկլավում իր վարչակազմի իշխանության պահպանում:
Մարտի 25-ին ՄԱԿ-ի Անվտանգության խորհուրդն ընդունել է տասը ոչ մշտական անդամների կողմից պատրաստված բանաձևի նախագիծ, որով կոչ է արվում անհապաղ հրադադար հաստատել Գազայի հատվածում մուսուլմանների սուրբ Ռամադան ամսվա ընթացքում։ Ի տարբերություն նախորդ անգամների՝ ԱՄՆ-ն վետո չի դրել բանաձևի ընդունման վրա, այլ ձեռնպահ է մնացել։ Իսրայելը քննադատել է իր դաշնակցի այս քայլը։
