Թուրքական Sabah թերթի փոխանցմամբ՝ ԱՄՆ-ի հայ համայնքը ստեղծել է «Ամերիկայի հայկական լեգեոն (զինյալներ)» կազմակերպությունը, որը նման է թուրք դիվանագետներին սպանած ASALA-ին (Հայաստանի ազատագրության հայ գաղտնի բանակ) և իր առջև նպատակ է դրել պայքարել Հայաստանի և ԱՄՆ-ի թշնամիների դեմ։
Neo-ASALA-ն ակտիվ քարոզչություն է իրականացնում Facebook-ում, ինչպես նաև ունի իր սեփական կայքը`Americanarmenianmilitia.com։ Բացի այդ, Կալիֆոռնիայի տարբեր հատվածներում շուրջ հազար մարդ հատուկ զինվորական պատրաստություն է անցնում:
Նրանք սովորում են կրակել ատրճանակից, հրացանից, դիպուկահար զենքերից: Այստեղ տիրում է զինվորական կարգապահություն: Առանձին գործում են նաև 2-5 հոգանոց հատուկ խմբեր, որոնք խիստ գաղտնի պատրաստություն են անցնում, այդ թվում՝ նաև մահափորձեր կատարելու համար:
Թուրքիայի Ազգային հետախուզական կազմակերպությունը (MIT) արդեն իսկ սկսել է զբաղվել Neo-ASALA-ի ուսումնասիրմամբ: Թուրքիայի ԱԳՆ-ն նաև զգուշացրել է ամերիկյան կողմին «անօրինական կազմակերպության» գոյության մասին:
Ակնկալվում է, որ այս հարցը քննարկվելու է ՄԱԿ-ի Գլխավոր ասամբելայի աշխատանքներին մասնակցելու նպատակով Նյու Յորք մեկնող Թուրքիայի վարչապետ Թայիփ Էրդողանի ամերիկյան այցի ժամանակ: