Էկոնոմիկայի նախարարությունում իրականացված հակակոռուպցիոն աղմկոտ, խոշոր գործողությունը, որ հանրության ուշադրությունը գրավել էր նախօրեին, խորքային առումով թերեւս հենց յուրայիններին միտված ցուցադրական ակցիա է, ինչի մասին է ըստ էության վկայում եւ այն, որ այդ գործողության շրջանակում իրավապահների «մոտ» է հայտնվել նաեւ ԱԺ նախագահ Սիմոնյանի եղբոր կինը: Այս պահի դրությամբ հայտնի չէ նրա քրեաիրավական կարգավիճակը, բայց նաեւ եղել է մամուլի տեղեկություն, որ դատարան է ներկայացվել նրան կալանավորելու միջնորդություն: Աղմկոտ գործի շրջաննակում սա խոսուն փաստ է:
Ընդ որում, այդ հանգամանքը ունի բազմակի օգտագործման հնարավորություն: Քաղաքական բարձրագույն ղեկավարությունը կամ պարզապես վարչապետ Փաշինյանը մի կողմից կարող է ցույց տալ հանրությանը, որ վարվում է հակակոռուպցիոն անխնա պայքար եւ այն կանգ չի առնի անգամ, եթե ճանապարհին հայտնվեն նույնիսկ բարձրաստիճան պաշտոնյաների հարազատներ կամ մերձավորներ: Մյուս կողմից, դա նաեւ հենց ներիշխանական շրջանակին «ահ» փոխանցելու, ներշնչելու ակտ է, որ՝ իրավիճակը մշտական վերահսկողության ներքո է եւ «խաղ աջ» կամ «խաղ ձախ»՝ կարժանանա կոշտ եւ խիստ վերաբերմունքի:
Վերջին ամիսներին բազմիցս շոշափել եմ այդ հանգամանքը, որ Նիկոլ Փաշինյանն ակնհայտորեն դիտարկում է քաղաքական արտահերթ զարգացումների սցենարներ՝ ըստ անհրաժեշտության կիրառելու համար, իսկ դա նրա համար կարեւորագույն հարց է դարձնում այսպես ասած թիմի վերահսկողությունը: Ընդ որում, հատկանշական է մի հանգամանք եւս: Օրեր առաջ ուշադրության արժանացրի այն, որ Ազգային ժողովի նախագահը տելեգրամյան իր ալիքում՝ Սահմանադրության վերաբերյալ Նիկոլ Փաշինյանի բացած թեմայի ֆոնին, որոշել էր «վերաբացել» զինանշանի եւ օրհներգի փոփոխության իր թեման:
Նկատել էի, որ այդ հանգամանքը կարծես թե խոսում է այն մասին, որ կա ոչ միայն Նիկոլ Փաշինյանին լավագույնս «շարունակելու» ներիշխանական մրցակցություն, այլ նաեւ գուցե մրցակցություն արտաքին հասցեատերերի հանդեպ նրան «գերազանցելու» հարցում, հատկապես, երբ բավականին աշխույժ են նաեւ խոսակցությունները, թե արեւմտյան գործընկերները դիտարկում են իշխանության ներսում Փաշինյանին այլընտրանքներ: Իրավիճակի այդ գնահատականիս ֆոնին, երկու օր անց տեղի է ունենում էկոնոմիկայի նախարարության հանդեպ իրավապահ խոշոր գործողությունը, որի, թեկուզ պայմանական, հարաբերական «թիրախներին» մեկն էլ դառնում է ԱԺ նախագահի եղբոր կինը:
