ԱՄՆ Հետաքննությունների դաշնային բյուրոյի աշխատակիցները խուզարկել են Նյու-Յորքի քաղաքապետարանի արարողակարգի ծառայության պետ Ռենա Աբասովայի տունը: Հետաքննությունը պաշտոնապես հարուցված է քաղաքապետ Էրիկ Ադամսի նկատմամբ: Նա կասկածվում է նախընտրական քարոզչության հիմանդրամին կոռուպցիոն սխեմաների օգտագործմամբ ֆինանսական միջոցների ներգրավման մեջ: Խոսքը, մասնավորապես, վերաբերում է Բրուկլինի վարչական շրջանում Թուրքիայի գլխավոր հյուպատոսության կառուցման նպատակով հողահատկացման դիմաց 60 հազար դոլար նրա նախընտրական հիմնադրամին փոխանցելուն:
Գործարքն, ըստ երեւույթին, կատարվել է Նյու-Յորքում Turkish Airlines ավիաընկերության ներկայացուցչության միջոցով: Հայտնի է դարձել, որ ՀԴԲ աշխատակիցները խուզարկել են նաեւ այդ ավիաընկերության նախկին ներկայացուցիչ Ջենք Օզալի նյու-յորքյան բնակարանում: Մանրամասնություններ հայտնի չեն, բացի այն, որ Նյու-Յորքի քաղաքապետարանում Ռենա Աբասովայի նկատմամբ ծառայողական քննություն է կատարվել, արդյունքում պարզվել է, որ նա թույլ է տվել մի շարք խախտումներ, որոնց մասին իրավապահ մարմինները տեղեկացվել են: Ըստ երեւույթին, խնդիրը ծառայողական թերացման կամ անփութության մեջ չէ, այլապես թույլ տված խախտումների մասին իրավապահ մարմինները չէին տեղեկացվի:
Աբասովան մինչեւ հետաքննության ավարտը պաշտոնից հեռացված է: Այս սկանդալային պատմության մեջ ուշագրավն այն է, որ Ռենա Աբասովան 2009 թվականին, Ադրբեջանի պետական բժշկական համալսարանն ավարտելուց հինգ տարի անց Նյու-Յորք է մեկնել ուսումնառությունը շարունակելու նպատակով եւ մասնագիտացել դիմա-ծնոտային վիրաբուժության ուղղությամբ՝ ունենալով ատամբնաբույժի որակավորում, սակայն կարճ ժամանակ անց նշանակվել է «Ամերիկա-ադրբեջանական հանրության »Նյու-Յորքի տարածքային կառույցի տնօրեն: Այդ կարգավիճակում Աբասովան հայտնվել է Բրուքլինի վարչական շրջանի ղեկավար Էրիկ Ադամսի մերձավոր շրջապատում, դարձել նրա խորհրդականը: Նյու-Յորքի քաղաքապետ ընտրվելուց հետո Ադամսը նրան նշանակել է քաղաքապետարանի արարողակարգի բաժնի պետ:
«Ամերիկա-ադրբեջանական հանրությունը»ստեղծվել է Ադրբեջանի կառավարության նախաձեռնությամբ: Կառույցի ֆինանսական կարիքները հոգալու պարտականությունը դրվել է տրանսպորտի նախարար Զիյա Մամեդովի վրա, որի որդին՝ Անար Մամեդովը մշտական բնակություն է հաստատել Վաշինգտոնում եւ գլխավորել «հանրությունը»: Ադրբեջանական մամուլում ժամանակին բազմաթիվ հրապարակումներ են արվել Անար Մամեդովի արդյունավետ գործունեության, ամերիկյան քաղաքական եւ բիզնես շրջանակների հետ սերտ կապերի, կազմակերպած ճոխ ընդունելությունների մասին: Անար Մամեդովին հաջողվել է Բաքվում իրականացվող կառուցապատմանը ներգրավել Դոնալդ Թրամփի ընտանիքին պատկանող շինարարական ընկերությանը: Բաքվի քարոզչությունը լայնորեն Trump Tower բրենդը: Նախագահ ընտրվելուց հետո Դոնալդ Թրամփը պահանջել է իր անունը հեռացնել, կառուցված շենքերին տրվել է Bacu Tower անվանումը:
Նյու-Յորքի քաղաքապետն այսօր կասկածվում է թուրքական շրջանակների հետ կոռուպցիոն կապերի մեջ: Նրա աշխատակցուհին, որ Բաքվից է Նյու-Յորք տեղափոխվել եւ առայսօր պահպանում է «Ամերիկա-ադրբեջանական հանրության»տարածքային ստորաբաժանման տնօրենի կարգավիճակը, թույլ է տվել խախտումներ, որ իրավապահների ուշադրությանն են արժանացել այնքան, որ նրա բնակարանը խուզարկվել է: Արդյոք հետքերը չե՞ն տանում դեպի Ադրբեջանի իշխանություն-Նյու-Յորքի քաղաքապետ կոռուպցիոն համագործակցության:
