Բանակում տիրող իրավիճակի վերաբերյալ կազմակերպված այսօրվա քննարկման ժամանակ իրավապաշտպան Արթուր Սաքունցը և փորձագետ Ռիչարդ Կիրակոսյանը ռազմական օմբուդսմենի ինստիտուտի ստեղծումը անհրաժեշտություն համարեցին: Այս առաջարկին ի պատասխան՝ քննարկման մասնակից ՊՆ իրավաբանական վարչության ներկայացուցիչ Արտյոմ Սեդրակյանը նշեց, որ 1995թ. ընդունված ՀՀ Սահմանադրությամբ, ինչպես նաև 2005թ. կատարված սահմանադրական փոփոխություններով ռազմական օմբուդսմենի ինստիտուտի առկայություն չի նախատեսվում:
Ռազմավարական և ազգային հետազոտությունների հայկական կենտրոնի փորձագետ Էդգար Վարդանյանը «Առաջին լրատվականի» հետ զրույցում նկատեց, թե պարտադիր չէ, որ Սահմանադրությունը նախատեսի նման ինստիտուտի ստեղծումը. «Դա կարող է հասարակական պաշտոն լինել, և ռազմական օմբուդսմենը կարող է լինել իրավաբանական անձ` հասարակական ինստիտուտի կարգավիճակով: Այս դեպքում որևէ հակասություն Սահմանադրության հետ չի լինի»:
Վարդանյանը նկատեց, որ անգամ եթե ռազմական օմբուդսմենի ինստիտուտը Սահմանադրությամբ նախատեսված չէ, սակայն հնարավոր է, որ ԱԺ-ն օրենք ընդունի, որում էլ կամրագրվի այդ ինստիտուտը և դրան կտրվի պետական կարգավիճակ, ու այս գործընթացը չի հակասի Սահմանադրությանը:
Փորձագետը նշեց, որ այդ ինստիտուտի ձևավորման հարցում որևէ խնդիր չկա, միակ հարցը կապված է օմբուդսմենի լիազորությունների հետ, որոնք էլ կարելի է ամրագրել համապատասխան օրենքում:
