News Georgia-ի փոխանցմամբ՝ սեպտեմբերի 12-14- Թբիլիսիում տեղի է ունենում արտասահմանում Վրաստանի դիվանագիտական ներկայացուցիչների ավանդական հանդիպումը, որին մասնակցում է նաև երկրի բարձրագույն ղեկավարությունը։ Առաջին օրը նրանց ընդունել են Վրաստանի նախագահ Միխեիլ Սաակաշվիլին ու արտգործնախարար Գրիգոլ Վաշաձեն։
Այսօր տեղի ունեցած ասուլիսի ժամանակ Վաշաձեն հայտարարել է. «2012 թվականը շատ ծանր է լինելու վրացական դիվանագիտության համար։ Պետք է լուծել բազմաթիվ առաջադրանքներ, ինչը կրկնապատիկ ջանքեր է պահանջում։ Արտասահմանում Վրաստանի դիվանագիտական ներկայացուցչությունների ղեկավարներն աշխատավայրեր կվերադառնան իրենց առջև դրված առաջնահերթությունների ու առաջադրանքների հստակ գիտակցմամբ։
Նրանց հետ հանդիպման ժամանակ նախագահն ուշադրություն է հրավիրել այն բարդ մարտահրավերների ու խնդիրների վրա, որոնք 2012 թվականին դրվելու են Վրաստանի առջև։ Նա խնդրել է, որ բոլորն անխտիր իրենց մեջ ռեզերվներ ու ռեսուրսներ գտնեն՝ սեփական աշխատանքը որակական այլ մակարդակի հասցնելու համար»։
Հիշեցնենք, որ երեկ էլ Վաշաձեն բարձրաձայնել էր Վրաստանի արտաքին քաղաքականության այն 4 առաջնահերթ ուղղությունների մասին, որոնց վրա հաջորդ տարի պետք է լուրջ աշխատանքներ տարվեն.
«Դրանցից առաջինը վերաբերում է Վրաստանում անվտանգ ու խաղաղ իրավիճակի ստեղծմանը, որպեսզի շարունակվեն ժողովրդավարական բարեփոխումներն ու տնտեսական շինարարությունը։ Երկրորդը վերաբերում է ապաօկուպացման խնդրին. ռուսական զորքերը պետք է դուրս բերվեն օկուպացրած տարածքներից՝ Աբխազիայից և Հարավային Օսիայից, և սկսվի խաղաղ գործընթաց։
Երրորդ առաջնահերթ ուղղությունը ներդրումների ներգրավումն է, իսկ չորրորդը՝ արագ տեմպերով եվրոպական ու եվրատլանտյան կառույցներին ինտեգրվելը»։
