Նևադայի Բլեք Ռոք անապատում «Burning Man» («Այրվող մարդ») ամենամյա 8-օրյա տոնախմբության 70 հազար այցելու մնացել է ծուղակում այն բանից հետո, երբ հորդառատ անձրևը հեղեղել է տարածքը և մինչև ծնկները հասնող ցեխ առաջացրել։ Այս մասին հաղորդում է CNN-ի հրապարակումը։
Տեղատարափից հետո այցելուներին հրահանգվել է մնալ տեղում, խնայել ջուրն ու սնունդը։ Իշխանությունները հայտնել են, որ տարածքում կար ավելի քան 70 հազար մարդ։ Ոմանք տարածքը լքել են ոտքով։
Սեպտեմբերի 3-ի առավոտյան միջոցառման կազմակերպիչները հայտնել են, որ ճանապարհները դեռ փակ են մնում, քանի որ չափազանց ցեխոտ են և անանցանելի։ Ավելին, դարձյալ սպասվում են վատ եղանակային պայմաններ։
Ի դեպ, տոնախմբությունից ոտքով հեռացել են նաև ամերիկացի երգիծաբան, դերասան Քրիս Ռոքը և ամերիկացի դիջեյ և պրոդյուսեր Դիպլոն։ Նրանք սոցիալական ցանցերում հայտնել են, որ մի քանի կմ ցեխի միջով քայլելուց հետո ճանապարհին իրենց վերցրել է մի մեքենա։
«Burning Man»-ի կազմակերպիչները հայտնել են, որ եթե եղանակը թույլ տա, ապա տոնախմբության ավարտին կայրեն հսկա փայտե մարդու նմանակը, ինչն անում են ամեն տարի։
Իշխանությունները նաև հայտնել են տոնախմբության ընթացքում 1 մարդու մահվան մասին՝ հավելելով, որ դա կապված չէ անձրևների հետ։
