Եվրամիությունը Նիգերում իր ներկայացուցչության անձնակազմին թույլ է տվել լքել երկիրը, բայց ներկայացուցչության տարհանման վերաբերյալ պաշտոնական որոշում չի կայացվել։
Այդ մասին լրագրողներին հայտնել է ԵՄ արտաքին քաղաքական ծառայության պաշտոնական ներկայացուցիչ Նաբիլա Մասրալին։
«Մենք որոշում ենք ընդունել Նիգերում մեր ներկայացուցչության անձնակազմին թույլ տալ լքել Նիամեյը՝ տեղի ունեցած զինվորական հեղաշրջման պատճառով, բայց Եվրամիության ներկայացուցչության տարհանման վերաբերյալ ոչ մի պաշտոնական որոշում առայժմ չի ընդունվել», – նրա խոսքերն է մեջբերում ТАСС-ը:
Մասրալին ընդգծել է, որ ներկայացուցչության անձնակազմն այժմ կարող է «լքել երկիրն իր ցանկությամբ»:
Անցյալ շաբաթ Նիգերում նախագահական պահակախումբը խռովություն կազմակերպեց, հանդես եկավ ազգային հեռուստատեսությամբ և հայտարարեց պետության ղեկավար Մոհամեդ Բազումի պաշտոնանկության, սահմանների փակման և երկրում պարետային ժամ մտցնելու մասին։
