Business-Грузия-ի փոխանցմամբ՝ Վրաստանի նախագահ Միխեիլ Սաակաշվիլին՝ վարչապետ Նիկա Գիլաուրիի ու էներգետիկայի նախարար Ալեքսանդր Խետագուրիի հետ, այցելել է Ջավախք և հետևել Փարվանայի հիդրոէլեկտրակայանի (ՀԷԿ) կառուցման աշխատանքներին։
Վարչապետը Սաակաշվիլիին իրազեկել է 2011-2012 թվականներին պլանավորված աշխատանքների ընթացքի մասին և ընդգծել, որ ՀԷԿ-ը շահագործման կհանձնվի 2013 թվականի վերջին։
Նշվում է, որ «Ջորջիան ուրբան էներջի» ընկերությունը Փարվանայի ՀԷԿ-ի կառուցմանը ձեռնամուխ է եղել 2009 թվականի սկզբին։ ՀԷԿ-ի ներդրումային ծավալը կազմում է 125 միլիոն դոլար։
ՀԷԿ-ի հզորությունը կազմում է 78 մեգավատտ, իսկ տարեկան արտադրությունը՝ 425 միլիոն կիլովատտ/ժամ։
Հիշեցնենք, որ 2010 թվականին Վրաստանի բոլոր էլեկտրակայաններում արտադրվել է վերջին 7 տարիների համար ռեկորդային քանակությամբ էլեկտրաէներգիա՝ 10.1 միլիարդ կվտ/ժամ։ Ընդ որում, դրանից 9.3 միլիարդ կվտ/ժամն արտադրվել է հիդրոէլեկտրակայաններում, իսկ 0.8 միլիարդ կվտ/ժամը՝ ջերմաէլեկտրակայաններում։
Վրաստանն այժմ սկսել է էլեկտրաէներգիա մատակարարել Արևելյան Եվրոպային, որն իրականացվում է Թուրքիայի տարածքով։ Բացի այդ, Վրաստանը մտադիր է 2014 թվականից սկսած՝ Հայաստանի տարածքով էլեկտրաէներգիա մատակարարել Իրանին։ Դրա համար էլ Վրաստանը զարկ է տալիս ՀԷԿ-երի կառուցմանը։
