Երևանի գլխավոր ճարտարապետ Նարեկ Սարգսյանն այսօր ներկայացրեց Երևան քաղաքում առաջիկա ամիսներին սպասվող և այժմ ընթացող ճարտարապետական աշխատանքները:
Նա նշեց, որ Ալ. Սպենդիարյանի արձանը կմնա նույն տեղում, քանի որ առաջարկել են Գարեգին Նժդեհի արձանը կառուցել ոչ թե 3-րդ մասի հրապարակում, այլ Հանրապետության փողոցին հարակից մասում: Շուտով քաղաքում նոր արձաններ կլինեն, այդ թվում`Մանթաշովի, Ֆրիտյոֆ Նանսենի։ Վերջինիս արձանի քանդակագործն է լինելու Գարեգին Դավթյանը: Բացի այդ, երեքշաբթի օրը պարզ կլինի`ով է Կարեն Դեմիրճյանի արձանը քանդակելու հաղթող ճանաչվել: Հոկտեբերի սկզբին կբացվի Շառլ Ազնավուրի տուն-թանգարանը, օրակարգում է Հրանտ Մաթևոսյանի տուն-թանգարանի հարցը, ինչպես նաև՝ Մնջախաղի թատրոնի շենքի խնդիրը: Նարեկ Սարգսյանի խոսքերով` աշխատանքներ են իրականացվում, որ այն Հյուսիսային պողոտայում լինի:
Բացի այդ, Երևանի գլխավոր ճարտարապետը նշեց, որ նոր փողոցների կառուցում կլինի՝ Սարյանում, Հյուսիսային պողոտան էլ ավարտված չէ, հիմա աշխատանքեր են սկսվում Լալայանց և Պուշկին փողոցներն իրար կապելու ուղղությամբ:
Նարեկ Սարգսյանը անդրադարձավ նաև Երիտասարդական պալատի ճակատագրին, սա համարեց ցավոտ հարց, ասաց, որ թեև այդ ուղղությամբ մրցույթներ անցկացվեցին, ճապանոցի ճարտարապետ հաղթեց, բայց հստակ ասել, թե երբ կլինեն շինարարության սկիզբն ու ավարտն, այս պահին չի կարող: Նա նշեց, որ կիսակառույց շենքերի կառուցապատողներին ուղարկված է գրություն, որ հստակ ժամանակացույց ունենան, թե երբ ավարտին կհասցնեն շինարարական աշխատանքները:
Հարցին` Հյուսիսային պողոտայում ի՞նչն է Ձեզ դուր գալիս, Նարեկ Սարգսյանը պատասխանեց, որ ավելի ճիշտ կլինի ասել, թե ինչը դուր չի գալիս: Նա նշեց, որ իրեն դեռևս միջավայրը դուր չի գալիս, քանի որ այն, ըստ նրա, շատ չոր է, բայց հիմա լուրջ փաթեթ են մշակել՝ փոփոխությունների ենթարկելու համար, կանաչ գոտիները պետք է ավելանան։ «Ես համոզված եմ, որ այն պետք է լինի քաղաքի կարևոր առանցքներից մեկը»,- ասաց Նարեկ Սարգսյանը:
