ՀՀ ԱԺ տնտեսական հարցերի մշտական հանձնաժողովի նախագահի տեղակալ, ԱԺ «Քաղաքացիական պայմանագիր» խմբակցության պատգամավոր Բաբկեն Թունյանը Ֆեյսբուքի իր էջում գրել է․
«Այսօր շատ լրատվամիջոցներ, հղում անելով ինձ, նշել են, որ 2024 թվականի հունվարի 1-ից ծխախոտը կվաճառվի սպիտակ տուփերով: Իրականում, դա ոչ թե նորություն է, այլ հիշեցում, որ 2020 թվականին ընդունված օրենսդրական փաթեթում, ի թիվս այլ սահմանափակումների (ծխելու արգելք՝ հանրային սննդի վայրերում, ցուցադրության արգելք և այլն), կա նաև, այսպես կոչված, պարզ փաթեթավորման պահանջը:
Դա նշանակում է, որ բոլոր տուփերը պետք է լինեն նույնատիպ, նույն գույնի տուփերով՝ առանց տարբերանշանների, լոգոյի և դիզայնի այլ էլեմենտների: Այս դրույթի ուժի մեջ մտնելու ժամկետը 2024 թվականի հունվարի 1-ն է: Իսկ ինչու եմ այդ մասին հիշեցրել հանձնաժողովի այսօրվա նիստում:
Խնդիրն այն է, որ ծխախոտի փաթեթավորման և մակնշման մեր պահանջները չեն կարող տարբերվել ԵԱՏՄ տեխնիկական կանոնակարգերից: Իսկ ըստ այդ կանոնակարգի, ծխախոտը պետք է վաճառվի ծխելու հետևանքով տարբեր հիվանդություններ պատկերող նկարներով:
2020 թվականին, երբ այն ժամանակ առողջապահության նախարար Արսեն Թորոսյանը ներկայացնում էր օրենքը, մենք հարցրեցինք՝ իսկ 2024 թվականին հակասություն չի՞ առաջանալու ԵԱՏՄ-ի հետ: Հարցին ի պատասխան՝ նշվել է, որ մինչ այդ պետք է փորձենք համոզել ԵԱՏՄ գործընկերներին, որ կանոնակարգերը համապատասխանեցնեն մեզ:
Այս դրույթի ուժի մեջ մտնելուն մնացել է 7 ամիս, և հավանականությունը, որ ԵԱՏՄ-ն իր տեխնիկական կանոնակարգը կփոխի, շատ ցածր է: Դրա համար, այսօր արդեն մեր գործընկեր պատգամավոր Արսեն Թորոսյանին, հիշեցնելով այս մասին, հարցրել եմ՝ ի՞նչ է լինելու հունվարի 1-ից հետո:
Արդյո՞ք պետք է մեր ընդունած օրենքը փոխենք, թե պետք է ընդունենք ԵԱՏՄ-ի պայմանները: Թե՞ այլ բան պետք է անենք: Իսկ սա կարևոր հարց է, որովհետև ծխախոտ արտադրող և ներմուծող ընկերություններին կանխատեսելիություն և հստակություն է պետք: Տուփեր փոխելը ժամանակ է պահանջում, և մարդիկ պետք է իմանան ինչ խաղի կանոններ են գործելու հունվարի 1-ից հետո»:
ԱԺ տնտեսական հարցերի հանձնաժողովի նիստում Թունյանն այսօր հայտարարել էր, որ 2024թ. հունվարի 1-ից Հայաստանում ծխախոտը պետք է վաճառվի սպիտակ տուփերով, որոնց վրա ոչինչ չպետք է պատկերված լինի։
