Գեղարքունիքի մարզի 124 հանրակրթական դպրոցներից 5-օրյա աշխատանքային գրաֆիկ ունեցող 110 դպրոցներում տեղի ունեցան ավարտական «Վերջին դաս» միջոցառումները։
Ինչպես տեղեկացրին Գեղարքունիքի մարզպետի աշխատակազմի ԿՄՍ վարչությունից, «Վերջին դաս» միջոցառման առիթով դպրոցներ են այցելել եւ շրջանավարտներին շնորհավորել Գեղարքունիքի մարզպետի տեղակալներ, մարզպետի տեղակալներ Ռուբիկ Նավոյանը և Վահան Զարոյանը, մարզպետի աշխատակազմի պատասխանատու աշխատակիցներ, ստորաբաժանումների ղեկավարներ։
«Վերջին դաս» ավարտական միջոցառումների ընթացքում շրջանավարտներն իրենց երախտագիտությունն են հայտնել հարազատ կրթօջախին ու մանկավարժներին, հանդես եկել հրաժեշտի խոսքերով։
Գեղարքունիքի մարզպետի աշխատակազմի ԿՄՍ վարչության տվյալների համաձայն՝ 2022-2023 ուսումնական տարվա ավարտին Գեղարքունիքի մարզն ունի 4120 շրջանավարտ, որից 1534-ը՝ 12-րդ, իսկ 2586-ը՝ 9-րդ դասարանցիներ են ։
1-ական 12-րդ դասարանի շրջանավարտ ունեն Ճամբարակի թիվ 4, Ախպրաձորի եւ Ջաղացաձորի միջնակարգ դպրոցները, իսկ 1-ական 9-րդ դասարանի շրջանավարտ՝ Անտառամեջի, Այրքի, Ջաղացաձորի, Շատվանի միջնակարգ եւ Գեղամաբակի հիմնական դպրոցները։
ՀՀ ԿԳՄՍ նախարարության ենթակայությամբ գործող ավագ դպրոցներն այս ուսումնական տարվա ավարտին ունեն 354 12-րդ դասարանցի շրջանավարտներ, իսկ Վարդենիկի կրթահամալիրը եւ Ծաղկունքի բաց դպրոցը միասին՝ 36 9-րդ դասարանցի շրջանավարտներ։ 122 9-րդ դասարանցի շրջանավարտ ունի Մարտունու թիվ 2 հիմնական եւ 63 12-րդ դասարանի շրջանավարտ՝ Լիճքի միջնակարգ դպրոցները։
9-րդ դասարանի շրջանավարտ չունեն Ճամբարակ համայնքի Մարտունի գյուղի միջնակարգ եւ Ազատ գյուղի հիմնական դպրոցները։
12-րդ դասարանի շրջանավարտներ չունեն Ծափաթաղ, Կախակն, Նորաբակ, Տրետուք բնակավայրերի միջնակարգ դպրոցները։
Գեղարքունիքի մարզպետ Կարեն Սարգսյանը «Վերջին դասի» առթիվ շնորհավորական ուղերձ է հղել ուսուցիչներին, շրջանավարտներին եւ նրանց ծնողներին։
Գեղարքունիքի մարզի 6-օրյա աշխատանքային գրաֆիկ ունեցող 14 դպրոցներում «Վերջին դասին» նվիրված միջոցառումները տեղի կունենան մայիսի 27-ին։
