Թուրքական Doğan լրատվական գործակալության փոխանցմամբ՝ Թուրքիայի ազգային պաշտպանության նախարար Իսմեթ Յըլմազը Սըվազում հայտարարել է, որ Պաշտպանության նախարարության բյուջեից 20 միլիոն դոլար է հատկացվել՝ սեփական ուսումնական ու ռազմական ինքնաթիռների արտադրության համար.
«Թուրքիայում արդեն մեկնարկել են ռազմական ինքնաթիռների արտադրությանն ուղղված համապատասխան աշխատանքները, ստորագրվել են ուսումնական ու ռազմական ինքնաթիռների դիզայնի վերաբերյալ պայմանագրերը։ Դա երկարատև ծրագիր է։ Շատ երկրներ դա ավարտին են հասցնում 20 տարվա ընթացքում։ Մենք նոր ենք սկսում դա։ Եթե մեզ համար դա արդեն ուշ է, ապա նույնը չի կարելի ասել մեր երեխաների ու թոռների մասին»։
Յըլմազը նաև անդրադարձել է ահաբեկչության դեմ պայքարին. «Մենք պայքարելու ենք մեր երկրում ահաբեկչությունն արմատախիլ անելու համար։ Չի կարելի մեկ ակնթարթում վերացնել բոլոր դժվարությունները, դրա համար ժամանակ է անհրաժեշտ»։
Հիշեցնենք, որ այս տարվա ապրիլի կեսերին Թուրքիայի ռազմաօդային ուժերի (ՌՕՈՒ) նախկին (2009-2011) հրամանատար, բանակի գեներալ Հասան Աքսայը հայտարարել էր, որ Թուրքիայի ՌՕՈՒ-ն 25 տարի անց
կհամալրվի սեփական արտադրության մարտական ինքնաթիռներով.
«Այսօրվանից սկսած մենք աշխատանքներ ենք տանում այդ ուղղությամբ: Մեր ինքնաթիռը պատրաստ կլինի 25 տարի անց: Տարածաշրջանում մենք ունենք ամենահզոր ՌՕՈՒ-ն և հպարտանում ենք դրանով»:
