ՀՀ կառավարության այսօրվա նիստում գործադիրը վերաբաշխում է կատարել 2011թ. պետբյուջեում, փոփոխություններ և լրացումներ` իր ավելի վաղ ընդունած որոշումներից մեկում և Մեսրոպ Մաշտոցի անվան Մատենադարանի նորակառույց գիտական մասնաշենքի գլխավոր ընթերցասրահի համար վեց մեծադիր վահանակների և էլեկտրոնային պատի ձեռքբերման նպատակով հատկացրել 4 մլն 500 հազար դրամ։ Նշված սարքավորումներով հնարավոր կլինի այցելուին ցուցադրել նորագույն տեխնոլոգիաների ներդրմամբ ստեղծված առաջին գիրք-ալբոմը և հայ միջնադարյան մանրանկարչության գլուխգործոցները։
Կառավարության մեկ այլ որոշմամբ՝ «Քվանտ» վարժարանին երեք տարի ժամկետով թույլատրվել է 2011-2012 թթ. ուսումնական տարվանից միջնակարգ կրթության երրորդ աստիճանի 11-12-րդ դասարաններում «Միջազգային բակալավրիատի դիպլոմա» ծրագիրն իրականացնել անգլերեն։
2011 թ. հոկտեմբերի 13-20-ը Միացյալ Արաբական Էմիրություններում կայանալիք հաշմանդամային ծանրամարտի աշխարհի առաջնությանը ՀՀ մասնակցությունն ապահովելու նպատակով կառավարությունը «Հայաստանի ազգային պարալիմպիկ կոմիտե» հասարակական կազմակերպությանը հատկացրել է 1 մլն 682 հազար դրամ։
