«Իմ՝ Մարգար Օհանյանի պաշտոնը ստանալու մասին խոսակցություններ չկան». այսօր լրագրողների հետ ճեպազրույցի ընթացքում լրագրողի հարցին՝ նշանակվելո՞ւ է արդյոք Մարգար Օհանյանի պաշտոնին, նման պատասխան տվեց ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը։ «Խնդրում եմ, այդպիսի լուրեր մի տարածեք, ես այդպիսի տեղեկություն չունեմ։ Եթե ինձ հեռավոր մի տեղ ծառայության նշանակեն, ես ծառայող եմ և պետք է անեմ։ Նման որոշումներ կայացվում են ոստիկանության վերադասերի կողմից»,- եզրափակեց թեման Ն.Սարգսյանը։
Խոսելով ճեպազրույցի բուն թեմայի շուրջ՝ նա նշեց, որ սեպտեմբերի 2-ից մեկնարկում է «Ուշադրություն, երեխաներ են» խորագրով ճանապարհատրանսպորտային տասնօրյակը։ Գնդապետի փոխանցմամբ՝ արդեն ավարտին են մոտեցել բոլոր նախապատրաստական աշխատանքները։ «Աշխատելու ենք հատուկ գրաֆիկով, բոլոր դպրոցամերձ շրջաններում լինելու են ճանապարհատրանսպորտային պարեկների մեքենաներ, որոնք վերահսկելու են երթևեկությունը»,- ընդգծեց Ն.Սարգսյանը՝ հավելելով, որ դպրոցներում մոտ ապագայում լինելու են 10-ժամյա դասընթացներ, որոնք երեխաներին կծանոթացնեն ճանապարհատրանսպորտային կանոններին։ Գնդապետը խոսեց նաև նոր վարորդական իրավունքների մասին՝ տեղեկացնելով, որ բոլոր ժամկետանց վարորդական վկայականները պետք է փոխվեն։
«Անցյալ տարի տասնօրյակի ընթացքում գրանցվել է 6 ճանապարհատրանսպորտային պատահար, որի հետևանքով զոհվել է մեկ երեխա, որպեսզի այս տարի նման արդյունք չգրանցենք, պետք է միահամուռ կերպով պայքարենք երթևեկության կանոնները պահպանելու համար»,- նշեց Ն.Սարգսյանը։
