«Վերջին մեկ տարվա ընթացքում ոչ մի դասախոս ԵՊՀ-ից չի հեռացվել կոռուպցիայի պատճառով: Ավելին՝ դասախոսին կաշառակերության հարցում մեղադրելը մեր խնդիրը չէ, և դա պատկան մարմինների գործն է»,- լրագրողների հետ հանդիպման ժամանակ խոսելով ԵՊՀ-ում կոռուպցիայի հաղթահարման գործընթացի մասին՝ ասաց ԵՊՀ ռեկտոր Արամ Սիմոնյանը:
Նա նշեց, որ ԵՊՀ-ի գիտական խորհրդի կողմից մշակվել և ընդունվել է համալսարանի հակակոռուպցիոն ծրագիրը, որտեղ մանրամասն նշված են ծրագրի հիմնական ուղղությունները, պայմանները, ինչպես նաև մոնիտորինգի անհրաժեշտությունը. «ԵՊՀ-ում գոյություն ունի հակակոռուպցիոն հանձնաժողով, որի մեջ ներգրավված են ինչպես անձնակազմի աշխատակիցներ, այնպես էլ ուսանողության ներկայացուցիչներ»:
Հակակոռուպցիոն խումբը, Սիմոնյանի վստահեցմամբ, ամիսը մեկ կամ երկու անգամ նիստեր է գումարում և իրականացնում է մոնիտորինգ: Սիմոնյանը նշեց, որ այս ծրագրի իրականացման շրջանակներում բուհը համագործակցում է ոչ միայն ԿԳ նախարարության հետ, այլ նաև տեղի և միջազգային հասարակական կազմակերպությունների հետ, որոնք մասնագիտացել են հակակոռուպցիոն ծրագրերի ոլորտում:
ԵՊՀ ռեկտորը նշեց, որ հակակոռուպցիոն ծրագրի մեջ է մտնում նաև քննական գործընթացների թափանցիկությունը: Նա վստահեցրեց, որ այժմ քննությանը կարող են ներկա լինել թե քննվողի կուրսեցիները, թե ուսանողական կազմակերպություններից ներկայացուցիչներ:
Հարցին, թե գոհ են հակակոռուպցիոն ծրագրից, Սիմոնյանը պատասխանեց. «Գոհ կլինենք միայն այն ժամանակ, երբ կտրուկ կնվազեն նման երևույթները, կամ դրանց մասին մենք կունենանք հստակ պատկերացում: Կարևորը, որ մենք ընկալում ենք այդ պայքարի անհրաժեշտությունը, որ մենք ծածկադմփոց չենք անում ոչ մի խնդիր այս ոլորտում»:
