Միացյալ Նահանգների վարչակազմը, հավանաբար, այս շաբաթ կհայտարարի Ուկրաինային մոտավորապես 600 միլիոն դոլար գումարի զինամթերքի հերթական մատակարարման մասին: Սեպտեմբերի լույս 13-ի գիշերն այդ մասին հաղորդել է Politico թերթը՝ վկայակոչելով ԱՄՆ-ի Կոնգրեսի աշխատակազմի՝ անունը չհայտնած ներկայացուցչի:
Նրա խոսքով՝ ինչպես եւ վերջերս 675 միլիոն դոլարի չափով օգնության փաթեթի դեպքում, տեխնիկան եւ զենքը Կիեւին կմատակարարվեն Պենտագոնի պահուստներից: Հրատարակության զրուցակիցը նշել Է, որ մատակարարումները շատ բանով համանման կլինեն ռազմական օգնության նախորդ փաթեթին, բայց թե հատկապես ինչ կլինի փաթեթում, նա չի ճշտել:
Ինչպես անցյալ հինգշաբթի հայտնել Է Միացյալ Նահանգների պաշտպանության նախարարության մամուլի ծառայությունը, ԱՄՆ-ի իշխանությունները 675 միլիոն դոլարի ռազմական օգնության փաթեթի շրջանակներում Կիեւին կհանձնեն լրացուցիչ ռազմամթերք HIMARS համազարկային կրակի հրթիռային համակարգերի համար, HARM հակառադիոտեղորոշման հրթիռների նոր խմբաքանակ, 105 միլիմետր տրամաչափի չորս հաուբից:
Բացի դրանից, Միացյալ նահանգներն Ուկրաինային կմատակարարեն 105 միլիմետր տրամաչափի 36 հազար հրետանային արկ, 100 զրահապատ ավտոմոբիլ, ավելի քան 5 հազար հակատանկային համակարգեր, 1,5 միլիոն փամփուշտ հրազենի համար, հազար 155-միլիմետրանոց արկ՝ հեռավար ականապատման համար, լրացուցիչ նռնականետեր եւ հրազեն, բժշկական զրահապատ ավտոմոբիլներ եւ գիշերային տեսունակության համակարգեր: Ընդամենը ներկայիս վարչակազմի օրոք ԱՄՆ-ը Կիեւին Է տրամադրել շուրջ 15,2 միլիարդ դոլարի, 2014 թվականից՝ 17,2 միլիարդ դոլարի ռազմական օգնություն, հաղորդել Է ՏԱՍՍ-ը:
