Սահմանագծման եւ սահմանային անվտանգության հարցերի հանձնաժողովի նիստը օգոստոսի երկրորդ կեսին նշանակվել է ադրբեջանական կողմի առաջարկով: Նման հայտարարությամբ է հանդես եկել ՀՀ անվտանգության խորհրդի քարտուղար Արմեն Գրիգորյանը՝ Արմենպրեսին տված հարցազրույցում՝ ավելացնելով, թե հայկական կողմը երկրորդ հանդիպմանը պատրաստ էր ե՛ւ հունիսին, ե՛ւ հուլիսին:
«Տարածաշրջանային կոմունիկացիաների բացման հարցով մենք բազմիցս արտահայտել ենք մեր պատրաստակամությունը: Վերջերս համացանցում հայտնվել է դեռեւս 2021թ. դեկտեմբերին դիվանագիտական ճանապարհներով մեր փոխանցած առաջարկների փաթեթը, որն այսօր էլ ուժի մեջ է»,- ասել է Արմեն Գրիգորյանը:
Ըստ նրա՝ Հայաստանը մի քանի այլ առաջարկներ եւս արել է, եւ մեծապես շահագրգիռ է տարածաշրջանային կոմունիկացիաների բացման հարցով, որը, Արմեն Գրիգորյանի խոսքով, «Հայկական խաչմերուկ» նախագծի մաս է:
«Իհարկե՝ նախագծի արեւելք-արեւմուտք հատվածի կոնկրետ երթուղու հարցը քննարկելի է, մենք երբեք չենք շեշտել միայն մի տարբերակի հնարավորությունը եւ մեզ նույնքան անհրաժեշտ է ամենաարդյունավետ երթուղին գտնել, որովհետեւ դրանից է կախված «Հայկական խաչմերուկ» նախագծի գործունակությունն ու գրավչությունը:
Կոմունիկացիաների հարցով եռակողմ աշխատանքային խմբում, որ համանախագահում են ՌԴ, Հայաստանի եւ Ադրբեջանի փոխվարչապետերը, մենք որոշակի առաջընթաց ենք նկատում եւ տրամադրված ենք շարունակել նույն ոգով»,- հայտարարել է Արմեն Գրիգորյանը։
