«Առաջին լրատվական»-ի զրուցակիցն է Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանը։
–Տիկին Վարդանյան, ԱՄՆ-ը փոխել է ԵԱՀԿ Մինսկի խմբի իր համանախագահին: Նոր համանախագահը Լորա Հոչլան է, որը զբաղեցնում է Կովկասի և ռեգիոնալ հակամարտությունների հարցերի գրասենյակի տնօրենի պաշտոնը: Ի՞նչ կարծիք ունեք այս փոփոխության մասին, ի՞նչ է այն ենթադրում։
-Ես կարծում եմ, որ այս փոփոխությունը ներկայիս փուլում շատ կարևոր է։ Լորա Հոչլան ժամանակավոր ներկայացուցիչ է, դեռ պետք է հաստատվի։ Չեմ կարող ասել՝ դա երբ կլինի, ԱՄՆ-ի քաղաքական իրավիճակն այժմ շատ խառն է։ Այդ նույն պատճառով էլ հնարավոր է Հայաստանում ԱՄՆ դեսպանի նշանակումը Սենատի կողմից մի քիչ հետաձգվի։ Նոյեմբերին ԱՄՆ-ում ընտրություններ են լինելու և հուսով եմ, որ մինչև ընտրությունները դա տեղի կունենա։
Սա ցույց է տալիս, որ ԱՄՆ-ի համար Հայաստանը կարևոր է։ Փաստորեն և՛ դեսպանի փոփոխություն է լինում և՛ համանախագահի, ԱՄՆ-ն չի կարող արհամարհել ղարաբաղյան հիմնախնդիրն ու Հայաստանն առհասարակ։ Ենթադրվում է, որ շուտով կլինի նաև մշտական ներկայացուցիչ։
–Մենք տեսնում ենք, սակայն, որ ի տարբերություն ԱՄՆ-ի ու Ֆրանսիայի, Մինսկի խմբի գոյությունն այնքան էլ չի կարևորվում Ռուսաստանի ու Ադրբեջանի կողմից։ Այդ դեպքում ի՞նչ զարգացումներ են հնարավոր։
-Ադրբեջանը պարբերաբար նման հայտարարություններ է անում, բայց ԱՄՆ-ի համար այդ խմբի գոյությունը կարևոր է։ Վաշինգտոնը ունի հստակ պատկերացում, որ առանց այդ խմբի գոյության անհնար է հասնել մնացած հարցերի լուծմանը, այդ թվում նաև խաղաղության հաստատմանը։ Հիշեցնեմ, որ երկար ժամանակ է, որ Ղարաբաղի խնդիրը եղել է միակ հարցը, որի շուրջ Ռուսաստանն ու արևմուտքը կարողացել են խոսել, բանակցել ու համագործակցել։ Կարծում եմ՝ դա հենց այդպես էլ կշարունակի մնալ։
-Բայց արդյոք դա հնարավոր է վերջին հայտարարությունների ֆոնին՝ առ այն, որ Մինսկի խումբ այլևս գոյություն չունի։
-Ես հնարավոր եմ համարում։ Ես չեմ մոռանում և բոլորն էլ գիտեն, որ բարձրախոսի առջև հնարավոր է մի բան ասել, փակ դռների հետևում այլ բան։ Բայց կարծում եմ, որ մարդիկ Ադրբեջանում, Ռուսաստանում կհասկանան Մինսկի խմբի կարևորությունը։ Սրան այլընտրանք չկա։
-Իսկ եթե այնուամենայնիվ Մինսկի խումբ չլինի, ի՞նչ եք կարծում ԱՄՆ-ն առանձին կպնդի՞ Ղարաբաղի կարգավիճակի հարցի հստակեցման անհրաժեշտությունը։
-Դա բոլորովին այլ է հարց է, դժվար է պատկերացնել։ Դուք այնուամենայնիվ լսել եք ԱՄՆ ներկայիս դեսպանի հայտարարությունները, որ կարգավիճակի հարցը մնում է չլուծված։ Ես հույս ունեմ ամեն դեպքում, որ Մինսկի խումբը կվերականգնի իր աշխատանքը։ Ես չէի ասի, որ ամենալավ տարբերակը կլինի առանձին աշխատել, Մինսկի խմբի գոյությունը խիստ անհրաժեշտություն եմ համարում։
