Ադրբեջանի նախագահ Իլհամ Ալիևը, ելույթ ունենալով Բաքվում Չմիացածների շարժման խորհրդարանական ցանցի համաժողովի բացմանը, հայտարարել է, որ ԵԱՀԿ Մինսկի խումբը մահացած է և դրա մասին հետագա շահարկումները կործանարար կլինեն տարածաշրջանում հնարավոր խաղաղության համար: «Մենք երկար սպասում էինք, որ միջազգային հանրությունը կօգնի վերացնել անարդարությունը և վերջ կդնի ադրբեջանական հողերի օկուպացիային: Այդ նպատակով 1992թ. ստեղծվեց Մինսկի խումբը: Այն կոչված էր լուծում գտնելու այս հակամարտությանը, այլ կերպ ասած՝ վերջ դնելու օկուպացիային: Բայց դրա փոխարեն Մինսկի խումբը վերածվեց գործիքի նրանց ձեռքում, ովքեր ուզում էին, որ այդ օկուպացիան անվերջ շարունակվի: Ադրբեջանը ռազմաքաղաքական ճանապարհով վերականգնել է իր տարածքային ամբողջականությունը: Մինսկի խմբի անհրաժեշտություն չկա, մենք դրան հրաժեշտ ենք տվել: Մինչդեռ Հայաստանն ու մի շարք երկրներ ցանկանում են վերականգնել այն, բայց դա հնարավոր չէ, այն մահացած է»,- ասել է Ալիևը: Նա հավելել է, որ Մինսկի խմբի շուրջ հետագա ցանկացած շահարկումներ ոչ միայն անարդյունավետ են, այլև կործանարար են տարածաշրջանում հնարավոր խաղաղության համար:
Քաղաքագետ Ռուբեն Մեհրաբյանը համարում է, որ Ադրբեջանի նախագահ Իլհամ Ալիևը զբաղված է շանտաժով․ «Ընդ որում՝ շանտաժ, որն ուղղված է Միացյալ Նահանգներին, Ֆրանսիային, եվրոպական կառույցներին ու առհասարակ արևմուտքին։ Սա «ստորևագրություն է» Ռուսաստանի շահերի տակ։ Այո՛, նա սպառնում է ապակայունացմամբ՝ եթե ինչ-որ բան սկսի իր դուրը չգալ։Ընդ որում՝ նա բացարձակապես միտված չէ որևէ կոնսենսուսային լուծումների։ Նա միտված է միայն «ամեն ինչը և միանգամից» սկզբունքին»,-«Առաջին լրատվական»-ի հետ զրույցում ասաց նա։
Ըստ Մեհրաբյանի՝ այս ամենի գլխավոր թիրախում մենք ենք, իրավիճակը պատանդը՝ ևս․ «Սրանից պետք է բխեն քայլեր, որոնք մեզ դուրս կբերեն այս պատանդային իրավիճակից»։
Հայաստանը պե՞տք է շարունակի պնդել, որ Մինսկի խմբի գոյության անհրաժեշտությունը կա, հարցին ի պատասխան, քաղաքագետն ասաց․ «Մենք պետք է պնդենք, որ կա անհրաժեշտություն Ղարաբաղի հարցի վերջնական կարգավորման։ Իսկ որօպեսզի հարցը վերջնականապես կարգավորվի, դրա համար պետք են համապատասխան միջազգային ինստիտուտներ, որովհետև Ադրբեջանի հետ բացառապես երկկողմ կամ ռուսական միջնորդությամբ հարթակները տանում են լուծումների, որոնք մեր շահերի հաշվին են ու ամենևին էլ կոնսենսուային լուծումներ չեն։ Այսինքն՝ լուծումներ են, որոնցից պետք է շահի Ադրբեջանը և Ռուսաստանը՝ մեր հաշվին։ Այդ հարթակների ստեղծման իմաստը դա։ Սա է պատճառը, որ Ալիևը Մինսկի խմբի հիշատակումների դեպքում ընկնում է հիստերիաների մեջ»,-եզրափակեց նա։
Քաղաքագետ Լևոն Շիրինյանը Ալիևի հայտարարությունները պատկերավոր է բնութագրում․ «Երբ գորտը իրեն շատ է երևակայում, պատկերացնում է փիղ՝ պայթում է։ Հայաստանի դեմ ագրեսիան եղել է Ռուսաստանի կազմակերպած սցենարով՝ Ադրբեջանի դերակատարութամբ, նրան Հայաստանի բանակի դեմ կռվելու հարցում օգնել են Թուրքիան՝ գումարած Հայաստանում գործող հինգերորդ շարասյունը, ռուսական ագենտուրան։ Այդ պայմաններում ծանրագույն մարտերում Հայաստանը պատերազմել է 44 օր և պահել այն, ինչ կարողացել է»,-«Առաջին լրատվական»-ի հետ զրույցում ասաց նա։
Ըստ Շիրինյանի՝ Ալիևը հիմա մոտավորապես այն վիճակում է, ինչ Հայաստանի նախկին նախագահները, երբ նստեցին հաղթանակի դափնիների վրա ու պետությունը տարան կործանման․ «Ալիևը ավտոկրատ է, ինչպիսին որ Պուտինն է, մեծացած չեկիստական ավանդույթներով։ Ճիշտ կլինի, որ նման շանտաժների փոխարեն մտածի՝ Հայաստանի հետ հարաբերությունների կանոնավորման մասին։ Եթե ինքը Ռուսաստանի թելադրանքի ծիրի մեջ է մնալու, հաջորդ հարձակվողը ռուսների թելադրանքով մենք ենք լինելու։ Ռուսները մեզ չօգնեցին պատերազմի ժամանակ, անտարբեր եղան, իրենց զինեցին, հաջորդ ցիկլում մենք ենք հաղթելու, եթե նույն սխեմայի մեջ են գործելու։ Ալիևի հաջորդը մեկ է Հայաստանի հետ գալու է երկխոսության, որովհետև հայ ժողովուրդը պատերազմից քաղած վերքերը բուժում է»։
Մեր զրուցակցի խոսքերով՝ Հայաստանին պետք է խաղաղություն՝ երկիր վերակառուցելու համար․ «Դրա համար պետք է խոսենք, բանակցենք, պնդենք Մինսկի խմբի գոյության անհրաժեշտությունը։ Հայաստանին դա պետք է, չպետք է ընդհատենք»։
