Սպառողների ազգային միությունը (Unc) հրապարակել Է այն 20 սննդամթերքների վարկանիշը, որոնց գինն Իտալիայում առավելագույն չափով աճել Է ընթացիկ տարվա մայիսին:
Այդ ցուցակի առաջին հորիզոնականն զբաղեցնում են բոլոր բուսական յուղերը, բացառությամբ ձիթայուղի, որոնք տարեկան հաշվարկով թանկացել են միանգամից ավելի քան 70 տոկոսով: Փորձագետներն այդ ռեկորդային արդյունքը միանշանակ կապում են բուսայուղի ու, նախեւառաջ, Ուկրաինայից արեւածաղկի ձեթի ներմուծման դադարեցման հետ: Վարկանիշի երկրորդ տեղում գտնվում Է կարագը, որի գինը 2021 թվականի մայիսի համեմատությամբ աճել Է 23,3 տոկոսով, երրորդ տեղն զբաղեցրել Է տանձը, որը թանկացել Է 22,9 տոկոսով: Ավելի քան մեկ հինգերորդով թանկացած սննդամթերքների խմբի մեջ մտնում են այնպիսի կարեւոր ապրանքներ, ինչպիսիք են լոլիկը (20,6 տոկոս) եւ մակարոնեղենը (20,5 տոկոս):
Հիմնական պարենամթերքի եւս մեկ դյուժին թանկացել Է ավելի քան 10 տոկոսով: Դրանց թվում են՝ ալյուրը (18,7 տոկոս), ընտանի թռչունը (13,8 տոկոս), մարգարինը (12,8 տոկոս), ձուն (12,3 տոկոս): Անցած տարվա ընթացքում Ապենիններում 11 տոկոսով աճել Է պաղպաղակի գինը, բրնձինը եւ հացինը թանկացել Է գրեթե 10 տոկոսով, նարնջինը՝ 9 տոկոսով: Unc-ի մասնագետներն իրենց վարկանիշը մշակել են Վիճակագրության ազգային ինստիտուտի (Istat) վերջին տվյալների հիման վրա, որոնք վկայում են, որ պարենային ապրանքների թանկացումն Իտալիայում շարունակվում Է Ուկրաինայի հակամարտության եւ Էներգակիրների գների կտրուկ բարձրացման ֆոնին: Ընդհանուր առմամբ, պաշտոնական վիճակագրության համաձայն, գնաճի մակարդակը մայիս ամսին տարեկան հաշվարկով աճել Է 6,8 տոկոսով: Նման մեծ աճ երկրում չի գրանցվել 1990 թվականի վերջից, հաղորդել Է ՌԻԱ Նովոստին:
