Ադրբեջանական Salam News գործակալության փոխանցմամբ՝ Թուրքիան մտադիր է մեծ ակտիվություն դրսևորել ՄԱԿ-ի Գլխավոր ասամբլեայի (ԳԱ) նստաշրջանում։ ՄԱԿ-ի ԳԱ հերթական նստաշրջանում թուրքական պատվիրակությունը գլխավորելու է Թուրքիայի վարչապետ Էրդողանը։ Թուրքական պատվիրակության կազմում կներառվեն նաև մի շարք նախարարներ, այդ թվում նաև արտգործնախարար Ահմեդ Դավութօղլուն։
Ակնկալվում է, որ ՄԱԿ ԳԱ-ի նիստում կքննարկվի Պաղեստինի, Սիրիայի, Աֆրիկայի (սովի), Մերձավոր Արևելքի, Կիպրոսի, և այլ հարցեր։
Թուրքիայի վարչապետ Էրդողանը ելույթ է ունենալու նստաշրջանի երկրորդ օրը՝ սեպտեմբերի 22-ին։ Իր ելույթում Էրդողանը բարձրացնելու է Աֆրիկայում տիրող երաշտի ու սովի հարցը, ինչպես նաև հրապարակելու է այս տարվա մայիսին Ստամբուլում տեղի ունեցած թույլ զարգացած երկրների կոնֆերանսի ժամանակ ընդունված որոշումների ու գործողությունների պլանը։
Հիշեցնենք, որ օրեր առաջ Էրդողանն այցելել է Սոմալի՝ դրանով իսկ դառնալով օտար պետության առաջին ղեկավար անձը, ով Սոմալի է այցելել վերջին 20 տարում՝ այնտեղ տիրող ներքին դիմակայության ժամանակ։ Այնտեղ Էրդողանն արևմտյան երկրներին կոչ է արել օգնել Սոմալիին. «Ժամանակն է, որ դարերի ընթացքում աֆրիկյան երկրները շահագործած Արևմուտքն այժմ վերադարձնի իր պարտքը։ Ժողովրդավարության ու մարդու իրավունքների պաշտպանության մասին հայտարարությունները պետք է ամրագրվեն գործով, որպեսզի ապացուցվի, որ արևմտյան արժեքները պարզապես դատարկ հռետորություն չեն։ Մարդկությանն անհրաժեշտ է հաջողությամբ հանձնել այս թեստը»։
