ԱՄՆ պետդեպարտամենտի աշխատակիցների նամակագրության համաձայն, որը տպագրել է Wikileaks կայքը, ամերիկացի դիվանագետները դժգոհ են, որ Ռուսաստանը մենաշնորհային դիրք ունի Եվրոպայի էներգամատակարարման բնագավառում: Այս մասին գրում է BBC-ին: Փաստաթղթերից մեկում տեղեկություն կա 2009 թ. ԱՄՆ փոխնախագահ Ջո Բայդենի Չեխիա կատարած այցի մասին, որի ընթացքում չեխական ղեկավարությունը Բայդենի հետ կիսվել է իր մտահոգություններով` կապված աշխարհում Ռուսաստանի` սեփական ազդեցության գոտիներ ստեղծելու հետ:
Բայդենն, իր հերթին, հավելել է, որ Ռուսաստանի դիրքորոշումը կարող է կտրուկ փոխվել, եթե Եվրոպան այլընտրանք գտնի ռուսական էներգակրիչներին: «Մեզ չի անհանգստացնում, գնո՞ւմ եք արդյոք դուք ատոմային էներգիան Ֆրանսիայից կամ ԱՄՆ-ից, սակայն եթե դուք դա գնեք Ռուսաստանից, ապա այս պարագայում իմ մոտ հարցեր կառաջանան», – այն ժամանակ ասել է Բայդենը:
Նրա խոսքերով՝ ինքը զարմացած է, որ Եվրոպայի երկրները պատշաճ կերպով չեն անդրադառնում այս խնդրին, որ «մի երկիր կարող է փակել իրենց մատակարարման խողովակը»:
Մեկ այլ փաստաթղթում, որը թվագրված է 2009 թ.-ով, ասվում է, որ ԱՄՆ-ը օգնություն է ցուցաբերել Ուկրաինային նրա` Ռուսաստանից ավելի քիչ կախվածություն ունենալու համար: Պաշտոնյաների նամակագրությունից պարզ է դառնում, որ ԱՄՆ-ը 380 մլն դոլար է ծախսել նրա համար, որպեսզի մեծացվեն Ուկրաինայի ատոմային էլեկտրակայանների հզորություններն ու նրա անվտանգությունը, որը կփոքրացնի կախվածությունը Ռուսաստանից:
