«Ռազմական միության ստեղծումը այս պահին Թուրքիային ձեռնտու չէ, և ես թերահավատորեն եմ վերաբերվում այդ գաղափարին»,- «Առաջին լրատվականի» հետ զրույցում կարծիք հայտնեց Ռուսաստանի քաղաքական և ռազմական վերլուծությունների ինստիտուտի ղեկավար, պահեստազորի գնդապետ Անատոլի Ցիգանոկը` անդրադառնալով ադրբեջանա-թուրքական ռազմական միության և հետագայում համադաշնության ստեղծման գաղափարին:
Նշենք, որ ադրբեջանցի հայտնի քաղաքագետներ Հիքմեթ Հաջիզադեն ու Վաֆա Գուլուզադեն Բաքվի «Ազադլըղ» թերթին տված հարցազրույցի ժամանակ հայտարարել են, որ Ադրբեջանի պետականության հիմնական սպառնալիքն այսօր բխում է Իրանից ու Ռուսաստանից։ Ըստ նրանց՝ Ադրբեջանի անվտանգության երաշխիք կարող է հանդիսանալ միայն Թուրքիայի հետ ռազմական դաշինքը, հետագայում նաև թուրք-ադրբեջանական կոնֆեդերատիվ պետության ստեղծումը։
Ցիգանոկը նկատեց, որ սա սուբյեկտիվ կարծիք է, և ոչ բոլորն են Ադրբեջանում կարծում, որ Ռուսաստանն իրենց երկրի համար սպառնալիք է: Փորձագետի գնահատմամբ՝ երբեմն նման կարծիքների համար հիմք է ծառայում այն հանգամանքը, որ Ռուսաստանը ցանկանում է պահպանել իր ներկայությունը Գաբալայում:
Ինչ վերաբերում է թուրք-ադրբեջանական ռազմական միության և համադաշնության ստեղծման գաղափարին, Ցիգանոկը նկատեց, որ իր կարծիքով առաջիկայում նման ռազմական միություն Ադրբեջանի և Թուրքիայի միջև չի կարող ստեղծվել: Ըստ փորձագետի՝ Թուրքիան Հարավային Կովկասում այսօր հետաքրքրված է ոչ թե Ադրբեջանով, այլ Իրանով, իսկ ո՛չ Իրանը, ո՛չ էլ Թուրքիան այս պահին չեն ցանկանում ստեղծել նման համադաշնություն, և հենց դա է այդ գաղափարի իրականացման գլխավոր խնդիրը:
