2021 թվականի ընթացքում Հայաստանում գրանցված հանցագործությունների ընդհանուր թվաքանակն աճել է 14,3 տոկոսով՝ կամ՝ 3777 դեպքով։ Այս մասին հրավիրված մամուլի ասուլիսին ասաց ՀՀ ոստիկանության պետի առաջին տեղակալ, գնդապետ Արամ Հովհաննիսյանը։
2020 թվականի ընթացքում 26 հազար 468 հանցագործության դեպք է գրանցվել, 2021-ի ընթացքում՝ 30 հազար 245, ինչը հիմնականում պայմանավորված է գողությունների, խարդախությունների, ճանապարհային երթևեկության կանոնները խախտելու, ինչպես նաև՝ լատենտային համարվող թմրամիջոցների ապօրինի շրջանառության դեպքերի աճով։ Նվազել են դիտավորությամբ առողջությանը վնաս պատճառելու, բռնաբարության ու բռնաբարության փորձի, բնակարանային գողության, կողոպուտի, յուրացման կամ վատնման ու խուլիգանության դեպքերը։
Փոխոստիկանապետի խոսքով՝ հանցագործությունների աճի զսպման ուղղությամբ տրվել են հանձնարարականներ՝ իրականացնել հստակ գործողություններ, որոնք արդեն իսկ տվել են դրական արդյունքներ։
Ոստիկանությունում 2021 թվականը հայտարարվել է ապօրինի զենքի ու զինամթերքի շրջանառության դեմ պայքարի տարի. առգրավվել ու կամովին հանձնվել է 943 միավոր զենք, որից 277-ը՝ ինքնաձիգ, 321՝ ատրճանակ, 15 գնդացիր, 9 նռնականետ, 1 ականանետ, 320 հրացան, մոտ 100.000 տարբեր չափի տրամաչափով փամփուշտներ։
