«Ոչ մի շաբաթ առանց Չարենցի» գրքում, որը լույս է ընծայել «Զանգակ» հրատարակչությունը, զետեղված են մեծ գրողի հայտնի ու սիրված գործեր, ինչպես նաև այդ ստեղծագործություններին առնչվող հուշեր, նամակներ, տարբեր ելույթներ, հոդվածներից հատվածներ, լուսանկարներ: Ընթերցողները կարող են հանդիպել նաև բացառիկ լուսանկարների, որոնք տրամադրել է Չարենցի տուն-թանգարանը:
Գիրքը, որի շնորհանդեսը տեղի ունեցավ մարտի 11-ին «Զանգակ» գրատանը, նվիրված է Եղիշե Չարենցի 125-ամյակին:
Գրքի կազմող, խմբագիր Հայկ Համբարձումյանն «Արմենպրես»-ի թղթակցի հետ զրույցում նշում է, որ «Ոչ մի շաբաթ առանց Չարենցի» ընտրանին հրատարակչության արդեն վեցերորդ նմանատիպ հատորն է: Հատորները սկզբում կոչվել են «Ոչ մի շաբաթ առանց պոեզիայի»:
Հատորներում ներառվել են թեմատիկ բանաստեղծություններ: «Հատորներն ընտանի-նոթատետրեր կամ ընտրանի-օրագրեր էին ի սկզբանե, այսինքն` տարվա 52 շաբաթներին համապատասխան 52 գրական ստեղծագործություն էինք ներառում, որոնց կողքին նշումներ անելու հատված կար:
Տարիների ընթացքում փոխվեց ձևաչափը. հասկացանք, որ մարդիկ նշումներ չեն անում և որպես նոթատետր չեն օգտագործում հատորները, ուստի գրքերը դարձան ընտրանիներ»,-պատմում է Համբարձումյանը:
Նոր հատորը նվիրելով Չարենցի հոբելյանին՝ այն անվանել են «Ոչ մի շաբաթ առանց Չարենցի», որում տարվա 52 շաբաթվան համապատասխան նյութեր են ներառել:
«Գիրքը կարծես ընդգրկուն պատկերացում է տալիս Եղիշե Չարենցի կյանքի ու ստեղծագործության մասին: Իհարկե, շատերը կփնտրեն բանաստեղծություններ, որոնք այստեղ չեն գտնի, սակայն փորձել եմ զետեղել այնպիսի գործեր, որոնք հանրության լայն շրջանակի սպասումները կարդարացնեն, ու նրանք նոր Չարենցի կգտնեն, նոր բացահայտումներ կանեն իրենց համար»,-շեշտում է գրքի կազմողը:
Հայկ Համբարձումյանը կարծում է՝ մեծ հեղինակները, մեծ ստեղծագործությունները ժամանակի ընթացքում սկսում են տարբեր կերպ ընկալվել: Նրա խոսքով՝ ինչպես յուրաքանչյուր ժամանակ իր էպոսն ունի, էպոսն իր ընկալումն ունի, այնպես էլ յուրաքանչյուր ժամանակ Չարենցի ընկալումն ունի:
«Չարենցն ինքն էլ իր ստեղծագործություններից մեկում ասում է, որ ամեն պահ ինքն ուրիշ է, ամեն պահ փոխվում է: Գրքից գիրք, բանաստեղծական շարքից շարք նա այնքան փոխվում է, նորանում է: Այս գրքում մարդիկ ուշադրություն կդարձնեն Չարենցի սթափեցնող ստեղծագործություններին, օրինակ՝ «Գիրք ճանապարհի» ժողովածուից պոեմներին կամ «Պատմության քառուղիներով» գործին, որը հինգ տարի առաջ բոլորովին այլ կերպ կկարդայինք, հիմա՝ այլ: Շատ կարևոր են Չարենցի դասերը հատկապես մեր պատմությունն ավելի լավ իմանալու, ավելի սթափ լինելու, ճիշտ գնահատելու տեսանկյունից»,-ընդգծում է Հայկ Համբարձումյանն ու հավելում, որ մեծանուն նկարիչ Մարտիրոս Սարյանը, որը Չարենցի հետ աշխատել է պետական հրատարակչությունում, նշել է՝ Չարենցը հայրենիքի մարտիկ էր գործի մեջ: Սարյանը Չարենցին լեգենդ է համարել ու ասել, որ նա մեծ բանաստեղծ է ու փոթորկուն կերպար:
