Ռուսաստանի կառավարությունը պաշտպանում է երկրի տարածքում իրենց գործունեությունը դադարեցնելու մասին հայտարարած օտարերկրյա ձեռնարկությունների ազգայնացման գաղափարը։ Այս մասին հայտնում են ռուսական լրատվամիջոցները:
Այս առաջարկն ավելի վաղ արել էր «Եդինայա Ռոսիա»-ն։ Օրինագիծը թույլ է տալիս դատարանի միջոցով արտաքին կառավարում մտցնել այն կազմակերպություններում, որոնց ավելի քան 25% մասնաբաժինը պատկանում է օտարերկրացիներին ոչ բարեկամ պետություններից, եթե նրանք դադարեցնեն իրենց գործունեությունը Ռուսաստանում։
Միաժամանակ սեփականատերը կարող է 5 օրվա ընթացքում հրաժարվել արտաքին կառավարումից՝ գործունեության վերսկսման կամ բաժնետոմսի վաճառքի դեպքում՝ պայմանով, որ բիզնեսը և աշխատատեղերը կպահպանվեն։ Եթե դա տեղի չունենա, ապա դատարանը 3 ամսով նշանակում է ժամանակավոր կառավարում, որից հետո նոր կազմակերպության բաժնետոմսերը հանվում են աճուրդի, իսկ հինը լուծարվում է։
