«Առաջին լրատվական»-ը զրուցել է ԱԺ տնտեսական հարցերի մշտական հանձնաժողովի փոխնախագահ Բաբկեն Թունյանի հետ:
-Պարոն Թունյան, Հայաստանի պետական պարտքը մոտեցել է 9,3 միլիարդ դոլարին: Ի՞նչ ռիսկեր է պարունակում պարտքի այսչափ ավելացումը Հայաստանի նման սահմանափակ տնտեսությամբ երկրի համար։ Ռուսական տնտեսությունից կախված Հայաստանի տնտեսությունը, այսպես կամ այնպես, էապես տուժելու է։
-Այո՛, Հայաստանի պետական պարտքը 9 մլրդ դոլարը գերազանցել է, բայց երբ հարցի մեջ նշում ենք Հայաստանի պես սահմանափակ տնտեսությամբ, բոլոր երկրների թույլատրելի պարտքի չափերն էլ որոշվում են ըստ այդ երկրի տնտեսության մեծության, մակարդակի զարգացվածության: Մեր դեպքում էլ Հայաստանի պետական պարտքի չափը համապատասխանում է մեր երկրի տնտեսության մասշտաբներին: 9,3 մլրդ դոլարի պարտքը ոչ թե բացարձակ թվով է ավելի կարևոր, այլ մեր ՀՆԱ-ի նկատմամբ հարաբերակցությամբ: Դա 60 տոկոսից մի քիչ ավել է, բայց ինչպես գիտեք, կառավարությունը հանձնառություն է ստանձնել մինչև այս տարվա վերջ պետական պարտք/ՀՆԱ հարաբերակցությունը մոտեցնել 60 տոկոսի: Այսինքն այս պահին պարտքի առումով անհանգստանալու առումով լուրջ հիմքեր չկան:
-Նշվում է, որ այս իրավիճակում մեզ նոր պարտքեր են սպասվում։ Ինչպե՞ս ենք այդ պարտքը նորմալ տեղաբաշխելու, երբ տնտեսությունը այս վիճակում է։
-Տնտեսության բնականոն գործունեության պարագայում քանի մենք ունենք բյուջեի դեֆիցիտ, մշտապես նոր պարտք ներգրավելու կարիք է լինում: Այդ առումով որևէ արտառոց բան էդտեղ չկա: նչ վերաբերում է բաշխմանը, ապա պարտքը հենց այնպես չի վերցվում, պարտքերը վերցվում են կոնկրետ ծրագրերի և բյուջեով նախատեսված միջոցառումների համար: Այսինքն մեզ համար ավելի կարևոր է այն, թե արդյոք մենք կարողանալո՞ւ ենք ամբողջական ծավալով պետական բյուջեից ծախսերը կատարել, ինչ ցանկանում ենք անել, թե ոչ: Իսկ պարտք վերցնելուց պետք չի վախենալ, եթե այդ պարտքը արդյունավետ և նպատակային տեղաբաշխվում է:
-Իսկ արդյոք կարողանալո՞ւ ենք պետական բյուջեի ծախսերը ամբողջական ծավալով իրականացնել, թե ոչ։
-Հույս ունեմ, որ կկարողանանք: Ամեն դեպքում նպատակը դա է: Եթե ծախսերը գրված են, ենթադրվում է, որ դրանք ամբողջ ծավալով պետք է իրականացվեն:
