Ադրբեջանի վերահսկողության տակ գտնվող Շուշիի շրջանում ականի պայթյունից երկու ադրբեջանցի է մահացել:
Ինչպես տեղեկացնում է ՏԱՍՍ-ը, այս մասին հայտնել է Ադրբեջանի գլխավոր դատախազության մամուլի ծառայությունը:
«Ականի պայթյունի հետևանքով զոհվել են երկու քաղաքացիական անձինք, որոնք վերանորոգման աշխատանքներ են իրականացրել Շուշիի շրջանի տարածքում»,- ասված է գերատեսչության հաղորդագրության մեջ:
Դեպքի առթիվ հարուցվել է քրեական գործ: Նշվում է, որ մահացած քաղաքացիները եղել են շինարարական ընկերության աշխատակիցներ, որը վերականգնողական աշխատանքներ է իրականացնում Քարին տակ գյուղում:
Ընդհանուր առմամբ 2020 թվականի նոյեմբերի 10-ից մինչ օրս 44 օրյա պատերազմի հետևանքով Ադրբեջանի տիրապետության տակ անցած տարածքներում ականի պայթյունի հետևանքով զոհվել է յոթ զինվորական, 29 քաղաքացիական անձ, ևս 109 զինվորական և 44 խաղաղ բնակիչ տարբեր աստիճանի ծանրության վնասվածքներ են ստացել։
