Այսօր Երիտասարդության միջազգային օրվան նվիրված միջոցառումների շրջանակներում ՄԱԿ-ի հայաստանյան գրասենյակում տեղի է ունեցել Խարբերդի մասնագիտացված մանկատան երեխաների աշխատանքների ցուցահանդես-վաճառքի բացման արարողությունը, որին ներկա էին ՀՀ աշխատանքի և սոցիալական հարցերի նախարարության պաշտոնատար անձինք, ԱՄՆ դեսպանատան աշխատակիցներ, պատվավոր հյուրեր, լրագրողներ:
Միջոցառման նպատակն էր մեկ անգամ ևս հասարակությանը ներկայացնել մանկատան առօրյան, այնտեղ իրականացվող աշխատանքները, սաների կարողությունները: Ցուցահանդեսին ներկայացված էին ձեռքի աշխատանքներ` ասեղնագործություն, կավից և փայտից պատրաստված իրեր, գոբելեն, մաքրամե, որոնք նրանց մտքի և հնարավորությունների արտահայտությունն էին:
ՄԱԿ-ի մշտական համակարգողի պաշտոնակատար Մարիա Դոցենկոն բացման խոսքում նշեց. «Բոլոր երեխաներն ունեն ընտանիքում ապրելու, այլ երեխաների կողքին հանրակրթական դպրոցում կրթություն ստանալու և հասարակական կյանքին մասնակցելու իրավունք: ՄԱԿ-ի գրասենյակն աջակցում է երեխաների իրավունքների պաշտպանության գործում իրականացվող աշխատանքներին ու ծրագրերին: Այս ցուցահանդեսը ևս առիթ է օգնելու և աջակցելու մեր երեխաներին»:
Մանկատան տնօրեն Հ. Բալասանյանը շնորհակալություն հայտնեց համագործակցող կողմին և իր խոսքում կարևորեց. «Մենք գնահատում ենք ՄԱԿ-ի աջակցությունն ու երեխաներին ընձեռած հնարավորությունը՝ հասարակության առջև իրենց արվեստը ցուցադրելու գործում: Մեզ համար առաջնային խնդիր է հասարակությանը ներկայացնել այս երեխաներին, նրանց հետ կապված խնդիրներն ու դժվարությունները, բայց և միաժամանակ փորձում ենք ցույց տալ, որ նրանք ևս ունեն մեծ ներուժ, օժտված են հիանալի ունակություններով և երկարատև աշխատանքի, հոգատարության ու խնամքի արդյունքում կարողանում են դրսևորել իրենց կարողությունները: Այս ցուցահանդեսը ասածիս վառ ապացույցն է»:
Մանկատան շնորհալի սաները գեղեցիկ աշխատանքների համար՝ ՄԱԿ-ի հայաստանյան գրասենյակի կողմից պարգևատրվեցին վկայականներով ու նվերներով:
