«Առաջին լրատվական»-ի հարցերին պատասխանել է Հայաստան համահայկական հիմնադրամի հիմնադրամի Ֆրանսիայի տեղական մարմնի ատենապետ Պետրոս Թերզյանը
Մեկնարկում է «Հայաստան» հիմնադրամի հեռուստամարաթոնը, երկու օրից էլ Հոգաբարձուների խորհրդի նիստն է կայանալու: Վերջին մեկ տարվա ընթացքում հիմնադրամի շուրջ աղմուկը բավականին մեծ էր: Այս անգամ ի՞նչ ակնկալիքներ կան, այդ աղմուկը որքանով ազդեցություն կունենա դրամահավաքի վրա:
Անցյալ կիրակի մենք Փարիզում վերջացրեցինք մեր ֆոնետոնը, և կարող եմ ասել, որ այս տարի 45 տոկոսով հավելում ունենք համեմատած 2019 թվականի հետ, երբ նորմալ տարի էր: Իսկ 2020-ին, որ պատերազմի գագաթանակետն էր, նվազումն ընդամենը 25 տոկոս էր կազմում: Այնպես որ այս աղմուկները, որ մարդիկ տարածում եմ Հիմնադրամի հետ կապված, մասնավորապես, Ֆրանսիայի մասով որևէ բացասական հետևանք չի ունեցել:
Կարո՞ղ ենք արձանագրել, որ սպասվածից ավելի լավ են եղել արդյունքները Ֆրանսիայում:
Ֆոնետոնի 4 օրերի ընթացքում աշխատակիցները հեռախոսային կապ են հաստատել մոտ 20 հազար ֆրանսահայերի հետ: Սա բավական մեծ թիվ է: Հետաքրքրականն այն է, որ 8 հազարից ավելի նվիրատվությունների շարքում ընդամենը 32 քաղաքական պատճառներով մերժում ենք ունեցել: Դրանք այն մարդիկ են, որ ասել են՝ Հիմնադրամի շուրջ եղած խոսակցությունները մեզ համար հաճելի չեն, պետք է սպասենք, որ ավարտին հասցվեն այդ խոսակցությունները, հետո կորոշենք՝ մասնակցել, թե ոչ: Այսինքն 8 հազարից ավելի նվիրատվության և 20 հազար հեռախոսային զրույցների արդյունքում ընդամենը 32 մերժում է եղել: Սա չնչին բան է, մարդիկ հավատարիմ են Հիմնադրամին:
Քաղաքական ու կուսակցական արշա՞վ կա Հիմնադրամի նկատմամբ: Ի՞նչ է տեղին ունենում:
Մարդիկ Հիմնադրամի նկատմամբ վստահություն ունեն, գիտեն, որ Հիմնադրամը ծառայում է Արցախին ու Հայաստանին, նաև գիտեն, որ մեր գործերը, մեր հաշիվները թափանցիկ են: Երեկ Ֆրանսիայի հարավային շրջաններից մեկը մեզնից խնդրեց, որ իրեն ուղարկենք վերջին երեք տարիների հաշվետվությունը: Մենք վայրկյանական ուղարկեցինք և մեր և ամբողջ Հիմնադրամի հաշվետվությունները: Մարդիկ բարձր են գնահատում, երբ տեսնում են, որ Հիմնադրամն իսկապես թափանցիկ է աշխատում, ամեն օր հաշիվ է ներկայացնում: Դուք ծանո՞թ եք որևէ այլ կազմակերպության, որ իսկույն էլեկտրոնային նամակին ի պատասխան իր հաշվետվությունները ներկայացնում է, չկա այդպիսի կազմակերպություն: Հետևաբար, մարդիկ վստահություն ունեն Հիմնադրամի նկատմամբ, գիտեն, որ քաղաքական բանավեճ գոյություն ունի, սուր քաղաքական պայքար կա, և ճիշտ է, երբեմն Հիմնադրամի մասին խոսում են քաղաքական մարդիկ, բայց մարդկանց ջախջախիչ մեծամասնությունը իրենց վստահությունը պահպանում են Հիմնադրամի հանդեպ: Սա է իրականությունը և մենք ֆոնետոնի ժամանակ տեսանք թվերով, փաստերով, որ այդ վստահությունը կա:
Մամուլը գրում էր, որ Դաշնակցությունը ԱՄՆ-ում կարծեք թե «Հայաստան» հիմնադրամի դեմ ուղղված հակաարշավ էր իրականացնում: Այդ առումով Ֆրանսիայում ի՞նչ վիճակ է:
Մեզ մոտ այդ տեսակ հարցեր չկան: Արդեն ասացի, որ ֆոնետոնի 4 օրերի ընթացքում միայն 32 մերժում ենք ունեցել: Ֆրանսահայությունում հասուն մարդիկ են, հասկանում են, գիտեն տարբերությունը քաղաքական բանավեճերի և Հիմնադրամի գործունեության միջև: Մենք հսկայական հավելում ունեցանք նվիրատվությունների, ու դա այս պայմաններում, երբ մի կողմից կա պատերազմի ազդեցությունը, մյուս կողմից կա կովիդի մթնոլորտն իր դժվարություններով: Հակառակ այդ ամենին, մարդիկ ավելի մեծ թվով մասնակցեցին:
Կարո՞ղ ենք ասել, որ այն, որ այս մեկ տարվա ընթացքում որոշ մարդիկ փորձում էին Հիմնադրամի վրա ստվեր նետել, չի հաջողվել, կամ այն արագ կվերականգնվի այս Հեռուստամարաթոնին ներկայացվող հաշվետվության հետ:
Վստահությունը Հիմնադրամի նկատմամբ մնայուն է, այն անկում չի էլ գրանցել, որ հիմա էլ անհրաժեշտություն առաջանա վերականգնելու: Վստահության վերականգնումից խոսում են քաղաքական մարդիկ, որոնք գաղափար չունեն Սփյուռքում տիրող իրավիճակից: Երևանի մեջ նստած խոսում են Հիմնադրամի հեղինակությունը, վստահությունը վերականգնելու մասին, խոսում են մի բանի մասին, որից տեղեկություն չունեն, չգիտեն, թե ինչի մասին են խոսում: Որպես քաղաքական պայքար գործածում են այդ բառը, բայց եթե դուք ուշադիր նայեք, կտեսնեք, որ նույնիսկ ընդդիմադիր քաղաքական մարդիկ, անուններ չեմ ուզում տալ, ասում են, որ Հիմնադրամը շատ կարևոր է, այն պետք է մնա և այլն:
Դուք գիտեք, որ երբ որևէ երկրում ընտրություններ են տեղի ունենում, որպեսզի մարդիկ իմանան, թե քվեարկողները ինչ մտադրություն ունեն, տարբեր տեսակի հարցումներ են անում, հարցնում են, թե դու ում ես տալու քո ձայնը, որից ելնելով եզրակացություններ են անում Ֆրանսիայի 70 մլն բնակչության վերաբերյալ: Մեր պարագայում 500 հազարանոց ֆրանսահայ համայնքում 20 հազար հոգու հետ խոսակցություն ենք ունեցել և բացի 32-ից մնացածը դրական են արձագանքել: Սա ենթադրություն չէ, սա վիճակագրություն է, 8 հազարից ավելի մարդ նվիրատվություն է արել:
