Բրյուսելում սպասվող Փաշինյան-Ալիև հանդիպման մասին տեղեկությունն ամբողջապես կլանել է Եվրամիության Արևելյան գործընկերության ծրագրի Վեհաժողովի հանդեպ հնարավոր ուշադրությունը: Մինչդեռ, խոսքը տևական ընդմիջումից հետո իրականացվող միջոցառման մասին է, որը կարող է էական նշանակություն ունենալ ռեգիոնալ կյանքում, մի շարք առումներով, այդ թվում հենց հայ-ադրբեջանական հակամարտության: Արևելյան գործընկերության ծրագրի դեկտեմբերյան Վեհաժողովը երևի թե պատասխանելու է հարցին, թե ինչ ապագա է սպասվում ծրագրին, կամ որքանով է գործնական ինտենսիվ աշխատանքի այն մտադրությունը, որ արտահայտվեց ամիսներ առաջ Եվրոպայի Խորհրդի նախագահի ռեգիոնալ այցի շրջանակում, այդ թվում այն մեծածավալ ֆինանսական փաթեթների շրջանակում, որ Եվրամիությունը մտադիր է հատկացնել մասնավորապես Հայաստանին ու Վրաստանին:
Բրյուսելում տեղի ունեցող Փաշինյան-Ալիև հանդիպման առնչությամբ դիտարկումներում խոսվում է այն մասին, որ հայ-ադրբեջանական կոնֆլիկտում Եվրամիության ներգրավումը կարող է զգալի նպաստ բերել ընդհանուր իրավիճակի կայուն կառավարման գործին: Սակայն, այդ իմաստով թերևս առավել էական է Արևելյան գործընկերության ծրագրի համատեքստում Եվրամիության ակտիվության հեռանկարը, որովհետև այդ ծրագիրը միջոց է, որը կապահովի Եվրամիության ռեգիոնալ առավել լայն, խորքային, բազմաշերտ և բազմաճյուղ ներգրավվածություն, հետևաբար նաև այդ շրջանակում ազդեցություն հայ-ադրբեջանական հակամարտության ուղղությամբ: Այդ տեսանկյունից ի դեպ հարց է թերևս, թե Փաշինյան-Ալիև հանդիպումը Եվրոպայի Խորհուրդը որքանով է դիտում Արևելյան գործընկերության հեռանկարի պրիզմայով: Բոլոր դեպքերում, հարկ է չմոռանալ և հանրային ուշադրության կենտրոնում պահել այն, որ դեկտեմբերի 15-ին Բրյուսելում Հայաստանի համար կարևոր իրադարձությունը լոկ Փաշինյան-Ալիև հանդիպումը չէ, այլ նաև ԵՄ Արևելյան գործընկերության Վեհաժողովը, որը շոշափելի նշանակություն է ունենալու նաև այն 2,6 միլիարդ եվրոյի ֆինանսական փաթեթի ճակատագրի իմաստով, որ Հայաստանին մտադիր է հատկացնել Եվրամիությունն առաջիկա հինգ տարիներին, թե տնտեսական, թե նաև զգալի առումով քաղաքական-անվտանգային էական նշանակություն ունեցող ուղղություններում: Հիշենք, որ այդ փաթեթից մի քանի հարյուր միլիոն եվրոն նախատեսված է ուղղել Սյունիքին՝ բիզնեսի աջակցության, ինչպես նաև Հյուսիս-հարավ ավտոճանապարհի կառուցմանը:
