Սյունիքն ԱՄՆ դեսպանատան առաջնահերթություններից է, Սյունիքի մարզպետի հետ հանդիպմանն ասել է Հայաստանում ԱՄՆ նորանշանակ փոխդեսպանը: Միացյալ Նահանգները տարբեր առիթներով և նախաձեռնություններով ընդգծել է Սյունիքի հանդեպ իր հետաքրքրությունը, ընդ որում դա տեղի է ունեցել ոչ միայն հետպատերազմյան իրավիճակում, Սյունիքի շուրջ հայտնի զարգացումների համատեքստում, այլ ընդհանրապես տարիների ընթացքում: Իհարկե որևէ կասկած չկա, որ ԱՄՆ համար այդ առաջնահերթությունը պայմանավորված է ամերիկյան ռազմավարությամբ և ընդհուպ աշխարհաքաղաքական նպատակներով: Այստեղ չկա «հեծանիվ հայտնագործելու» կարիք, այդպիսին է թե ԱՄՆ, թե Ռուսաստանի, թե Ֆրանսիայի, թե Իրանի, թե որևէ այլ պետության պարագայում: Ըստ այդմ, շատ կարևոր է, որպեսզի Սյունիքի առումով ռազմավարական առաջնահերթությունների կուռ համակարգ ձևավորի նաև Հայաստանը, և նախ և առաջ Հայաստանը:
Խոսքը իհարկե միայն Սյունիքի պաշտպանության մասին չէ, այլ նաև ենթակառուցվածքային զարգացման, որը անշուշտ ժամանակակից աշխարհում անվտանգային լայն համակարգի բաղադրիչ է: Այդ տեսանկյունից, Հայաստանի համար կարևոր խնդիր է այդ մշակումները ապահովելն ու դրանք այլ երկրների հետ հարաբերվելու հիմք դարձնելը, փորձելով համադրել նրանց ռազմավարությունների հետ, առավելագույնս մերձեցնել շահերն ու հետաքրքրությունները և դարձնել դրանք Սյունիքի պաշտպանության ու զարգացման հիմք, որպես ռազմավարական նշանակության հայաստանյան և հայկական ռեգիոն: Այդ իմաստով սակայն, բացի Հյուսիս-հարավ ավտոճանապարհային նախագծից, Հայաստանն առայժմ կարծես թե չունի Սյունիքի ուղղությամբ այլ ռազմավարական գաղափար, որը կարող է առաջացնել նաև աշխարհաքաղաքական խաղացողների որոշակի հետաքրքրություն և գործընկերային կոնկրետ հարաբերության ներուժ:
Շատ լավ է, երբ ԱՄՆ դեսպանատունը, ԱՄՆ ՄԶԳ Սյունիքում արդեն տարիներ շարունակ իրականացնում են բիզնեսի աջակցման ծրագրեր, լավ է, որ Եվրամիությունը Հայաստանին մեծածավալ ֆինանսական օժանդակության համատեքստում ծրագրում է մի քանի հարյուր միլիոն եվրո հատկացնել Սյունիքի զարգացման ծրագրերին, սակայն այդ ամենը ունի հայկական ռազմավարական հենքի, բազայի կարիք, որը թույլ կտա նաև բավականին ճկուն լինել քաղաքական օրակարգի ձևավորման և կառավարման հարցում: Այդ իմաստով, արտերկրի գործընկերների հայտարարությունները, որ Սյունիքը առաջնահերթություն է իրենց համար, կարծես թե տողատակում պարունակում են որոշակկի հարցադրում, թե՝ իհարկե անվտանգության և պաշտպանության խնդրից բացի, որո՞նք են հայկական, ընդհուպ գուցե համահայկական առաջնահերթությունները Սյունիքում:
