Ադրբեջանական ANS PRESS-ի փոխանցմամբ՝ Ադրբեջանի նախագահ Իլհամ Ալիևը, ելույթ ունենալով Ռամադանին նվիրված միջոցառման ժամանակ, անդրադարձել է ղարաբաղյան հակամարտության կարգավորմանը.
«Երկրի առջև կանգնած գլխավոր առաջադրանքը դա ղարաբաղյան հակամարտության կարգավորումն է։ Ես վստահ եմ, որ այն կարգավորվելու է։ Տվյալ հարցում մեր վստահության հիմքում առկա են մի շարք գործոններ. ա) միջազգային իրավունք, բ) մեր քաղաքական կշիռը, գ) տնտեսական պոտենցիալ, դ) մեր հաջող ապագան, ե) ժողովրդագրություն։
Հայաստանի ղեկավարությունը «պետք է» վերջապես հասկանա, որ գոյություն ունի ժողովրդագրական գործոն, որն արդեն իսկ այսօր զգացնել է տալիս իրեն։ Թո՛ղ նա պատկերացնի, թե ինչպիսին կլինի ժողովրդագրական պատկերը 5, 10, 15 տարի անց։
Ադրբեջանի բնակչությունն աճում է։ Նախորդ տարվա սկզբին աշխարհ եկավ Ադրբեջանի 9 միլիոներորդ քաղաքացին։ Այսօր արդեն Ադրբեջանի բնակչությունը կազմում է 9,160,000 մարդ։ Մինչդեռ Հայաստանում կրճատվում է բնակչությունը, տնտեսական պոտենցիալը, բնական պաշարները։ Այս ցանկը կարելի է շարունակել։
Բոլոր ոլորտներում Հայաստանի նկատմամբ Ադրբեջանի գերազանցությունն «անվիճելի» է: Վստահ եմ, որ այդ դեպքում անհնար կլինի ղարաբաղյան հակամարտությունը «սառեցված» վիճակում պահպանելը։ Տվյալ հարցով զբաղվողները՝ միջնորդ երկրների նախագահները նույնպես հայտարարել են, որ ստատուս-քվոն անընդունելի է։ Մենք ցանկանում ենք, որ Ադրբեջանի ինքնիշխանությունը շուտով վերականգնվի»։
Հիիշեցնենք, որ Ալիևը հայտնի է նրանով, որ ամեն պատեհ և անպատեհ առիթներով հիշատակում է ղարաբաղյան հակամարտության կարգավորման մասին։ Հունիսի վերջին Ալիևը Բաքվի մետրոպոլիտենի կայարաններից մեկի բացման արարողակարգի ժամանակ դարձյալ հիշել էր ղարաբաղյան հակամարտության կարգավորման մասին՝ ընդգծելով, որ ադրբեջանական բանակը «դասվում է» աշխարհի մասշտաբով հզոր բանակների թվին։
