Փանջշիրի գրավման մասին հայտարարությունից հետո «Թալիբանի» խոսնակ Զաբիհուլլահ Մուջահիդը հանդես է եկել մամուլի ասուլիսով: Հաստատելով նահանգի գրավման մասին լուրերը՝ նա հավաստիացրել է, որ գործողության ընթացքում քաղաքացիական անձանց շրջանում զոհեր չեն եղել: BBC-ի փոխանցմամբ՝ Մուջահիդը նաև հայտնել է, որ Փանջշիրի ղեկավարները և դիմադրության ուժերը փախել են:
Ի դեպ, հենց այդ պահին դիմադրության ղեկավար Ահմադ Մասուդը թվիթերյան իր էջում կատարել է հետևյալ գրառումը՝ «Ես ապահով եմ, ընկե՛ր, մի՛ անհանգստացիր»:
Ինչ վերաբերում է Աֆղանստանում նոր կառավարության ձևավորմանը, «Թալիբանի» խոսնակը դարձյալ կրկնել է այն խոստումները, որ կառավարությունը կներառի այլ ուժերի ևս, սակայն մանրամասներ չի հաղորդել:
«Թալիբանի» ներկայացուցիչը նաև հույս է հայտնել, որ շուտով կվերսկսվեն միջազգային թռիչքները: Ըստ Մուջահիդի՝ ԱՄՆ-ն Աֆղանստանից հեռանալուց առաջ վնասել է Քաբուլի օդանավակայանը, սակայն Թուրքիան և Քաթարն օգնում են ծառայությունները վերականգնելու հարցում: Աֆղանստանում արդեն իսկ վերսկսվել են ներքին թռիչքները:
«Թալիբանը» միջազգային հանրությանը խնդրել է օգնել Աֆղանստանի վերակառուցման հարցում: Շարժման ներկայացուցիչը կոչ է արել երկրներին շարունակել հումանիտար օգնություն տրամադրել Աֆղանստանին:
Պատասխանելով կանանց հանդեպ վերաբերմունքի մասին հարցին՝ Մուջահիդը կրկնել է նախորդ հայտարարությունները՝ ասելով, որ կանանց իրավունքները կհարգվեն շարիաթի կամ իսլամական օրենքի շրջանակներում: Նա, սակայն, դարձյալ չի մանրամասնել, թե դա ինչ կնշանակի գործնականում:
https://twitter.com/Mohsood123/status/1434774990709198849?ref_src=twsrc%5Etfw%7Ctwcamp%5Etweetembed%7Ctwterm%5E1434774990709198849%7Ctwgr%5E%7Ctwcon%5Es1_&ref_url=https%3A%2F%2Fwww.shantnews.am%2Fnews%2Fview%2F979727.html
