Հունիսի 7-12-ը տարածաշրջանային այցով ժամանում է ԱՄՆ պետքարտուղարի եվրոպական և եվրասիական հարցերով տեղակալի պաշտոնակատար Ֆիլիպ Ռիքերը։ հունիսի 9-10-ը կլինի Երևանում։
Ամերիկագետ Սուրեն Սարգսյանի խոսքերով՝ ԱՄՆ բարձրաստիճան պաշտոնյայի այց տարածաշրջան վաղուց տեղի չէր ունեցել․ «Մանավանդ նոր վարչակազմի ընտրվելուց հետո նման այց չէր եղել։ Հատկանշական է, որ մեր տարածաշրջանով զբաղվող ամենաբարձրաստիճան պաշտոնյան է այցելում։ Բնական է, որ ուշադրության կենտրոնում են լինելու թե՛ հայ-թուրքական հարաբերությունները, թե՛ հայ-ադրբեջանական հարաբերությունները, Լեռնային Ղարաբաղի խնդիրը։ Այնպես որ կարծում եմ, որ այցի արդյունքները հնարավորություն կունենանք ամփոփելու շատ շուտով»,-«Առաջին լրատվական»-ի հետ զրույցում ասաց նա։
Միևնույն ժամանակ մեր զրուցակիցը չի կարծում, որ Երևանի ու Վաշինգտոնի միջև կարող է սահմանվել համագործակցության նոր օրակարգ․ «Այցն առավելապես տարածաշրջանային բնույթ է կրում՝ հասկանալու համար, թե ինչ իրողություններ են այստեղ տեղի ունենում։ Մանավանդ հաշվի առնենք, որ Իրանում ևս առաջիկայում սպասվում են ընտրություններ, որն ինչ-որ առումով կարող է ազդել Իրանի արտաքին քաղաքական կուրսի վրա։ Կարծում եմ՝ ճանաչողական այց է և փորձում են հասկանալ, թե ինչ է տեղի ունենալու մեր տարածաշրջանում առաջիկա օրերին»։
Մեր այն դիտարկմանը, թե այցը համընկնում է Հայաստանում նախընտրական շրջանի հետ, Սուրեն Սարգսյանն արձագանքեց․«Չեմ կարծում, թե համընկնում է ընտրությունների հետ։ Վստահ եմ՝ շատ վաղուց պլանավորված այց է։ Նման այցերը՝ մանավանդ տարածաշրջանային բնույթի, եթե հատուկ անհրաժեշտություն չի լինում, ապա դրանք կազմակերպվում են ամիսներ առաջ։ Իսկ ամիսներ առաջ մենք ինքներս չգիտեինք՝ ընտրություններ լինելո՞ւ են, թե՞ ոչ։ Այնպես որ այստեղ նախընտրական նրբերանգ չկա»։
Սարգսյանի դիտարկմամբ՝ Բայդենի վարչակազմի հաստատումից հետո հայ-ամերիկյան հարաբերությունների բնույթը չի փոխվել․ «Այս ուղղությամբ հայկական կողմն ակտիվ աշխատանք չի տանում։ Բնականաբար օրակարգի ձևավորման հարցում մենք շատ լուրջ աշխատանք պետք է իրականացնենք, բայց նման բան դեռևս տեղի չի ունեցել, ուստի որևէ փոփոխություն հիմա սպասել պետք չէ»։
