ՀԱՊԿ խոսնակ Զայնետդինովը նախօրեին հայտարարել է Հայաստանում ՀԱՊԿ հատուկ զորավարժության անցկացման մասին՝ «Ամպրոպ 2021»: Զորավարժությունը անցնելու է հատուկ ուժերի, ավիացիայի, անօդաչուների, որոնող շների ներգրավումով: Նա հավելել է, որ հունիսի 1-3-ը Հայաստանում շտաբային բանակցություններ են անցկացվել վարժանքների նախապատրաստման համար, որոնք ենթադրում են ՀԱՊԿ արագ արձագանքման հավաքական ուժերի հատուկ նշանակության ուժերի ձևավորում: Հայաստանում ՀԱՊԿ զորավարժություն պետք է լիներ 2020 թվականի աշնանը, սակայն այն հետաձգվեց Արցախի դեմ թուրք-ադրբեջանական պատերազմի պատճառով, ինչը արդեն իսկ ինքնին շատ խոսուն փաստ է ՀԱՊԿ դաշնակցային կամ ավելի շուտ հակադաշնակցային նշանակության իմաստով: Այդ հանգամանքը ներկայումս պակաս էական չէ, հաշվի առնելով հայ-ադրբեջանական սահմանային վիճակն ու այդ առնչությամբ ՀԱՊԿ-ին Հայաստանի դիմումը:
Ադրբեջանական ստորաբաժանումները արդեն մի քանի շաբաթ Հայաստանի ինքնիշխան տարածքում են, այսինքն ՀԱՊԿ պատասխանատվության գոտում, Հայաստանը դիմել է կազմակերպությանը խորհրդակցություն սկսելու համար, սակայն մինչ այժմ չի եղել որևէ հստակ, առարկայական, և դաշնակցային բնույթի պատասխանատու արձագանք, ընդհանուր արարողակարգային բնույթի հայտարարություններից բացի: Այդ տեսանկյունից, արդյո՞ք Հայաստանում ՀԱՊԿ հատուկ զորավարժության մասին որոշումը կարող է դիտվել այսպես ասած խորհրդակցությունների արգասիք և արձագանք հայ-ադրբեջանական սահմանին ստեղծված իրավիճակին, թե՞ սա ընդամենը առկա իրավիճակում ՀԱՊԿ հեղինակությունը փրկելու գործ է, այսպես ասած դեմք պահելու փորձ, մինչ կլինի իրավիճակի հանգուցալուծման այլ զարգացում: Միարժեք ասելն անշուշտ դժվար է, սակայն հատկանշական է նաև մի բան, որ հատուկ զորավարժության մասին հայտարարվում է Երևանի նոր առաջարկի ֆոնին, որով փաստորեն օրակարգ բերվեց հայ-ադրբեջանական սահմանի որոշակի հատվածում ԵԱՀԿ Մինսկի խմբի անդամ երկրների դիտորդների հատուկ մեխանիզմ սահմանելու և դրանով իրավիճակը լիցքաթափելու հարցը, երբ հայկական և ադրբեջանական կողմերը կնահանջեն հավասարաչափ, և այդ մեխանիզմի ներքո կքննարկվի դեմարկացիայի հարց: Զայնեդտինովը խոսում է ՀԱՊԿ հատուկ ստորաբաժանում ձևավորելու ուղղությամբ Հայաստանում հրամանաշտաբային քննարկումների մասին, որոնք վերաբերել են անցկացվելիք զորավարժությանը: Արդյո՞ք սա պատասխան չէ ավելի շատ ոչ թե Հայաստանի դիմումին, այլ հենց առաջարկին, որպեսզի հայ-ադրբեջանական սահմանի որոշակի հատվածներում սահմանվի ՀԱՊԿ հատուկ ստորաբաժանումների, ոչ թե ԵԱՀԿ Մինսկի խմբի երկրների դիտորդների այսպես ասած վերահսկողություն-պարեկություն:
