Եվրամիությունը ցանկանում է երկխոսություն հաստատել Ռուսաստանի հետ, բայց Մոսկվան դրանով դեռ հետաքրքրված չէ: Այս հայտարարությունը շաբաթ օրն արել է Ավստրիայի արտաքին գործերի նախարար Ալեքսանդեր Շալենբերգը՝ մայիսի 24-ին ԵՄ գագաթնաժողովի նախօրեին, որի ժամանակ կքննարկվեն Ռուսաստանի հետ հարաբերությունները:
«Ռուսաստանի և ԵՄ հարաբերությունները հիմա հաստատ լարված և ծանրաբեռնված են: Ինչպես ասում են, տանգոն երկուսով են պարում: Եվրամիությունը ցանկանում է երկխոսություն: Մենք ուզում ենք երկխոսության ուղիներ, բայց դա պահանջում է այնպիսի արձագանք, որ մյուս կողմը ևս ցանկանում է», – ասել է նախարարը O1 ռադիոկայանի եթերում:
«Եվրամիությունն ու Ռուսաստանը պետք է համագործակցեն շատ ոլորտներում՝ սկսած կլիմայի խնդիրներից մինչև էներգետիկա», -ասել է Շալենբերգը: Նա հույս ունի, որ ԵՄ-ի ու Մոսկվայի հարաբերությունները կփոխվեն:
Շալլենբերգը շեշտել է, որ Եվրամիությունում «Ավստրիան միշտ ջանքեր է գործադրում Մոսկվայի հետ ամուր և կայուն երկխոսության համար»: «Կան բազմաթիվ թեմաներ, որոնց շուրջ մենք [ԵՄ-ն և Ռուսաստանը] ուզում ենք միասին աշխատել, և պետք է դա անենք: Հիմնական ոլորտներն են կլիմա, էներգետիկա: Այստեղ մենք պետք է համագործակցենք: Բայց մենք [ԵՄ-ն], իհարկե, չենք կարող ձախողել մեր արժեքները»,-ասել է նախարարը:
«Ես հուսով եմ, որ շուտով տոնայնությունը կփոխվի, որպեսզի մենք երբևէ կարողանանք միասին գոյատևելու ուղի գտնել: Որ դա հիմա դժվար է, կասկած չկա», – ասել է Շալենբերգը:
Մայիսի 24-25-ը Բրյուսելում ԵՄ երկրների ղեկավարները դեմ առ դեմ գագաթնաժողով կանցկացնեն, կքննարկեն Ռուսաստանի հետ հարաբերությունները և համավարակի հետ կապված իրավիճակը:
