Ադրբեջանի նախագահ Իլհամ Ալիևն օրերս մասնակցել է «Հարավային Կովկաս. տարածաշրջանային զարգացման և համագործակցության հեռանկարներ» համաժողովին, որի ընթացքում ասել է, թե Ադրբեջանը պատրաստ է համագործակցել Հայաստանի հետ:
«Մենք պատրաստ ենք Հայաստանի հետ համագործակցության, չնայած մեզ հասցրած ավերներին, մեր տարածքների 30 տարվա գրավմանը: Մեզ անհրաժեշտ է փոխադարձ համագործակցություն, քանի որ մենք հարևաններ ենք և պետք է սովորենք ապրել կողք կողքի»,- ասել է Ալիևը:
Նա նաև նշել է, որ Բաքուն պատրաստ է Երևանի հետ առևտրային հարաբերությունների, նայց դրա համար Ադրբեջանն ու Հայաստանը պետք է ճանաչեն միմյանց սահմանները.«Մենք մեր կողմից պատրաստ ենք ճանաչել Հայաստանի սահմանները, բայց Հայաստանն էլ պետք է ճանաչի Ադրբեջանի սահմանները՝ այդ թվում Ղարաբաղը ճանաչի որպես Ադրբեջանի մաս։Այնպես որ մենք հայկական կողմից սպասում ենք գործողությունների»։
Քաղաքագետ Անդրիաս Ղուկասյանի կարծիքով՝ հետևելով Ազգային ժողովի վերջին քննարկումների ժամանակ Նիկոլ Փաշինյանի հայտարարություններին, ապա պետք է գանք եզրահանգման, որ դա այն ճանապարհն է, որն ընտրել է Նիկոլ Փաշինյանը։
«Առաջին լրատվական»-ի հետ զրույցում Ղուկասյանն ասաց, որ այդ հարցի շուրջ հակադրություն Հայաստանում կարող է լինել երկու հարթության մեջ.«Առաջինը՝ քաղաքացիական անհնազանդությունն է։ Այսինքն՝ քաղաքացիները, անկախ իրենց կուսակցական համակրանքների, միասնական գործողություններ իրականացնեն՝ ընդդեմ Նիկոլ Փաշինյանի ընտրած ռազմավարությանը։ Երկրորդը՝ քաղաքական հարթությունն է։ Այսինքն՝ ընտրությունների ժամանակ կուսակցությունների պայքարը, որպեսզի մեր քաղաքացիները կատարեն ոչ միայն այս կամ այն ուժի միջև ընտրություն, այլ այս կամ այն զարգացման ճանապարհի ընտրություն»,-ընդգծեց նա։
Ղուկասյանի խոսքերով՝ այսօր կա կակարգավորման երկու ձևաչափ.«Առաջինը՝ Ռուսաստանը, Ադրբեջանը (Թուրքիան) ու Հայաստանը: Սրա իրականացումը սեպտեմբերի 27-ից հետևողական առաջ է բերվում՝ այդ թվում Հայաստանի իշխանությունների կողմից։ Երկրորդը՝ Ֆրանսիան-ԱՄՆ-ն ու Ռուսաստանը՝ Հայաստանի ու Ադրբեջանի հետ միասին։ Այսօր խնդիրն այն է, որ Նիկոլ Փաշինյանի կառավարությունն ընտրել է առաջին ձևաչափը՝ աշխատել ռուս-ադրբեջանական-թուրքական ձևաչափի հետ։ Ըստ էության խոսքը գնում է այն մասին, որ այդ ուղղությամբ ևս արվի քայլ, այդ ուղղությունն ամրապնդվի ևս մի եռակողմ համագործակցության մեխանաիզմով՝ սահմանների հաստատման հարցի շուրջ։ Դրա հետ միասին Հայաստանը պետք է կատարի այն մնացած քայլերը, որ Ադրբեջանը սպասում է Հայաստանից։ Սա մի իրողություն է, որը Նիկոլ Փաշինյանը համարում է խաղաղության դարաշրջան»։
Մյուս իրողությունը, մեր զրուցակցի խոսքերով, միջազգային իրավունքի ճանապարհով գնալն է.«Գնալ ԱՄՆ-ի ու Ֆրանսիայի հետ միասին, հասնել Արցախի Հանրապետության ճանաչմանը, մերժել ռուս-ադրբեջանական-թուրքական ձևաչափը և հասնել արժանապատիվ խաղաղության։ Դա ծանր ճանապարհ է, այդ ճանապարհով գնալու համար հարկավոր է ոչ միայն կամք ու համառություն, այլ համապատասխան գիտելիք։ Այս առումով այսօր մեր քաղաքական ուժերի զգալի մեծամասնությունը կաղում է և ներուժ չունեն։ Բազմաթիվ կուսակցություններ մտադիր են մասնակցել ընտրություններին, բայց եզակի են նրանք, ովքեր ունեն տեսլական, որը տարբերվում է Նիկոլ Փաշինյանի տեսլականից»,-եզրափակեց Ղուկասյանը։
