ՀԱՆՈՒՆ ՀԱՆՐԱՊԵՏՈՒԹՅԱՆ ԿՈՒՍԱԿՑՈՒԹՅՈՒՆ ՀԱՅՏԱՐԱՐՈՒԹՅՈՒՆ
ԱՄՆ 46-րդ նախագահ Ջո Բայդենի կողմից 1915-1923 թվականների իրադարձությունները ցեղասպանություն կոչելը աշխարհի թիվ մեկ գերտերության և ժողովրդավարության փարոս համարվող Միացյալ Նահանգների բարոյական պարտքն էր մարդկության առջև։ Նախագահ Բայդենի պաշտոնավարման առաջին տարում նախընտրական խոստման իրագործումը վերջինիս կողմից խիզախ և ազնիվ քաղաքական գործչի ու բարոյական բարձր արժանիքներով օժտվածության վկայությունն է։
Ճշմարտության բարձրաձայնման, ապագայում նման հանցագործությունների կանխման գործում նման գործիչների անհատական ներդրումը անգնահատելի արժեք է։ Այստեղ է կայանում համաշխարհային հանրության կողմից Հայոց ցեղասպանության ճանաչման ու դատապարտման կարևորագույն նպատակը։
Միլիոնավոր անմեղ զոհերի հայրենազրկված հետնորդներիս համար ԱՄՆ նախագահի խոսքը սպասված էր և մեծարժեք։ Այս հայտարարությունը Հայաստանի, Արցախի և աշխարհասփյուռ հայության համար աշխատանքի ահռելի ճակատ է բացել, որը շոշափում է ապագայի, տարածաշրջանի անվտանգության ամրապնդման ու զարգացման հեռանկարները։
«Հանուն Հանրապետության» կուսակցությունը ողջունում է ԱՄՆ նախագահ Ջո Բայդենի կողմից ճշմարտության բարձրաձայնումը։ Հավատում ենք, որ այս ուղերձը հիմք կհանդիսանա հայ-ամերիկյան հարաբերություններում նոր զարգացումների, որոնք, խարսխված լինելով Հայաստանի և ԱՄՆ-ի համատեղ շահերի վրա, կհանգեցնեն տարածաշրջանի ռազմավարական ոլորտներում մեր երկու պետությունների փոխհարստացմանն ու փոխհզորացմանը։
Աստված պահպանի Հայաստանն ու Ամերիկան։
«Հանուն Հանրապետության» կուսակցության ղեկավար մարմին։
