Բելառուսի նախագահ Ալեքսանդր Լուկաշենկոն ասաց, որ Ռուսաստանի առաջնորդ Վլադիմիր Պուտինը իր ամերիկացի գործընկեր Ջո Բայդենի հետ զրույցի ընթացքում բարձրացրեց հարցը, որ ամերիկյան հատուկ ծառայությունները մահափորձ են նախապատրաստում Բելառուսի պետության ղեկավարի և նրա ընտանիքի դեմ: Այդ մասին գրում է ՌԻԱ Նովոստին:
«Ես շնորհակալ եմ Պուտինին. Երբ նա խոսեց Բայդենի հետ, և նրան ուղղեց այս հարցը, պատասխանը քրթմնջոց էր, ուրիշ՝ ոչինչ», – ասաց Լուկաշենկոն:
Նրա խոսքով՝ Պուտինն այդ մասին ասել է Բաքվից վերադառնալուց հետո՝ հեռախոսազրույցի ժամանակ:
Ավելի վաղ Լուկաշենկոն հայտնել էր, որ բերման են ենթարկել մի խմբի, որը իր ու իր երեխաների դեմ մահափորձ է ծրագրել, և որի մեջ ներգրավված են եղել ԱՄՆ հատուկ ծառայությունները:
Դրանից հետո Անվտանգության դաշնային ծառայությունը հաղորդեց, որ բերման են ենթարկել երկու մարդու, որոնք Բելառուսում ռազմական հեղաշրջում իրականացնելու և հանրապետության նախագահ Ալեքսանդր Լուկաշենկոյին վերացնելու պլաններ են մշակել:
Ինչպես պատմել են կենտրոնում, Անվտանգության դաշնային ծառայությունը Բելառուսի Պետական անվտանգության կոմիտեի հետ համատեղ հատուկ գործողություն է իրականացրել, որի արդյունքում ճնշվել են երկու անձանց անօրինական գործողությունները: Խոսքը ԱՄՆ-ի և Բելառուսի երկքաղաքացիություն ունեցող Յուրի Զյանկովիչի և Բելառուսի քաղաքացի Ալեքսանդր Ֆեդուտայի մասին է:
