Թուրքիայի արտաքին գործերի նախարար Մեվլութ Չավուշօղլուի և Հունաստանի արտաքին գործերի նախարար Նիկոս Դենդիասի համատեղ հայտարարությամբ ելույթը Անկարայում հրապարակային վիճաբանությամբ է ավարտվել։ Այս մասին հայտնում է ՌԻԱ Նովոստին:
Նշվում է, որ Դենդիասը իր ելույթի ժամանակ հայտարարել է, որ Հունաստանում չկա թուրք փոքրամասնություն, այլ կա միայն մուսուլմանական փոքրամասնություն: Նա նաև հավելել է, որ Թուրքիան խախտում է Հունաստանի ինքնիշխան իրավունքները, և հարաբերությունները բարդանում են պատերազմի սպառնալիքի պատճառով, երբ Հունաստանը խոսում է իր ինքնիշխան իրավունքների իրականացման մասին:
«Իմ ելույթում ես Հունաստանի դեմ մեղադրական հայտարարություններ չեմ արել: Բայց նա (Դենդիասը) ասաց, որ մենք ոտնահարում ենք Հունաստանի ինքնիշխանությունը: Մենք չենք կարող ընդունել նման հայտարարություններ: Մեր գործողություններն ուղղված են Հունաստանում կիպրոսցի թուրքերի և թուրքական փոքրամասնությունների իրավունքների պաշտպանությանը: Թուրքական փոքրամասնությանը ասել. «Դուք թուրք չեք, այլ միայն մահմեդական եք» անմարդկային է », – ընդգծել է թուրք նախարարը:
Չավուշօղլուի խոսքով ՝ Թուրքիան իր գործունեությունն իրականացնում է Միջերկրական ծովում ածխաջրածնային հանքավայրերի հետախուզման ուղղությամբ՝ միջազգային իրավունքի շրջանակներում:
Դրանից հետո Դենդիասը նշել է, որ Հունաստանի դիրքորոշումը Էգեյան ծովի վերաբերյալ պարզ է ու հայտնի: Նա նաև հաղորդեց Հունաստանի օդային տարածքի հարյուրավոր խախտումների մասին:
Նա նաև ընդգծել է, որ Թուրքիան հաճախ խախտում է միջազգային իրավունքը: Բացի այդ, 2020 թվականի փետրվարին և մարտին տիրող իրավիճակից հետո, երբ հազարավոր միգրանտներ փորձեցին ճեղքել Հունաստանի սահմանը, Թուրքիան չի կարող դասեր տալ պետությանը:
«Ես առաջարկում եմ անվերջ վիճաբանության մեջ չընկնել», – ասել է Դենդիասը:
Իր հերթին, Չավուշօղլուն հավելել է, որ եթե հունական կողմը խոսում է Լոզանի պայմանագրի մասին, ապա պետք է ապառազմականացնի կղզիները:
«Եթե մենք շարունակենք այստեղ հարաբերություններ պարզել, ապա ընթրիքից կուշանանք», – ընդգծել է Չավուշօղլուն, որից հետո նա և Դենդիասը ծիծաղելով ավարտել են ասուլիսը:
