«Փաստ» թերթը գրում է. «Երեկ Արթուր Վանեցյանի ղեկավարած «Հայրենիք» կուսակցությունը բացել է հերթական գրասենյակը, այս անգամ՝ Երևան քաղաքի Արաբկիր վարչական շրջանում:
Ընդհանրապես, վերջին շրջանում այս կուսակցությունն առավել ակտիվացրել է իր գործունեությունը՝ նոր գրասենյակներ են բացվում հանրապետությունով մեկ, մարզային այցեր են իրականացվում, տարածքային կառույցները կազմակերպում են տարաբնույթ միջոցառումներ, հանդիպումներ:
Իհարկե, «Հայրենիք» կուսակցությունն արդեն հայտարարել է, որ արտահերթ ընտրություններ անցկացվելու դեպքում մասնակցելու են դրանց, սակայն դեռևս հստակ չէ՝ ինչ ձևաչափով են մասնակցելու՝ առանձի՞ն, թե՞ այլ կուսակցությունների հետ դաշինքով: Այս առումով տարբեր տեղեկություններ են շրջանառվում:
Բայց եթե հաշվի առնենք կուսակցության մեծ ակտիվությունը, ինչպես նաև, ինչպես նշեցինք, նորանոր գրասենյակների բացումը, ինտենսիվ հանդիպումները բնակչության հետ, կարծիք կա, որ նրանք մեսիջ են ուղարկում քաղաքական դաշտին, որ ունակ են նաև միայնակ մասնակցել ընտրություններին»:
Առավել մանրամասն՝ թերթի այսօրվա համարում:
