ԱԺ-ն այսօր ընդունեց շուրջ կես տարի գործող ռազմական դրությունը վերացնելու վերաբերյալ նախագիծը: Ի՞նչ վտանգներ կարող է պարունակել այս որոշումը, և արդյո՞ք իշխանությունը ռազմական դրության հանգամանքն օգտագործում էր իր ներքին շահերը սպասարկելու համար, ինչպես որ կարծում են ընդդիմադիրները: «Առաջին լրատվական»-ի հետ զրույցում անդրադառնալով այս հարցերին՝ քանդակագործ, նկարիչ Սահակ Պողոսյանը նշեց. «Ռազմական դրությունը չեղարկելու վերաբերյալ նախագծի ընդունումը, իմ կարծիքով, ավելի շատ ընտրությունների հետ է կապված, որովհետև ռազմական դրության պայմաններում ընտրությունների մասին հայտարարելը անիմաստ կազուս է. ուզեին, թե չուզեին, դա պետք է չեղարկվեր: Ինչ վերաբերում է ռազմական դրությանը, ես որպես երկրի բնակիչ, դա չեմ զգացել ինձ վրա, և ժողովրդի վրա նույնպես կարծես թե այնքան էլ ազդեցություն չէր թողնում»:
Անդրադառնալով դիտարկմանը, որ ընդդիմությունը մտավախություն ունի, թե իշխանությունները կարող են հետ կանգնել որոշումից և վերջին վայրկյանին չեղարկել արտահերթ ընտրությունները, Պողոսյանը նշեց. «Իշխանությունը պետություն է և հայտարարություն է արել ընտրությունների գնալու մասին, ի՞նչ է նշանակում, չեն հավատում իշխող ուժին: Ի՞նչ պետք է պատահի, աստերոի՞դ պետք է ընկնի այս երկրի վրա, որ այդ ընդունած որոշումը չեղարկեն: Ես չեմ կարծում, որ նման բան կարող է պատահել»:
«Ինձ հուզող խնդիրն այն է, որ Հայաստանը վերջիվերջո պետք է փողոցում իշխանություն ընտրելու տրամաբանությունից դուրս գա և մտնի նորմալ քաղաքակիրթ իշխանափոխության տիրույթ: Իշխանափոխությունն այսուհետև պետք է կատարվի միայն ու միայն ընտրությունների միջոցով, և ամենակարևոր գրավականն այն պետք է լինի, որ իշխանափոխությանը մասնակցող քաղաքական ուժերը պետք է ներկայացնեն իրենց ծրագիրը: Խնդիրն այն է, որ առայժմ հստակ ներկայացված ծրագիր չկա որևէ ուժի կողմից»,- նշեց Սահակ Պողոսյանը:
Մանրամասն՝ տեսանյութում:
