Միշտ երազանք եմ ունեցել՝ վերադառնալ Հայաստան, ապրել ու աշխատել հայրենիքում: Երբ եղբայրս տեղեկացրեց «Ի գործ» ծրագրի մասին, շատ ուրախացա: Այս մասին «Առաջին լրատվական»-ի հետ զրույցում նշեց Հայկ Մարգարյանը, ով ծնվել է Հայաստանում, ամբողջ կյանքում ապրել է արտերկրում՝ Ռուսաստանում, ԱՄՆ-ում, Կանադայում և 2020թ. «Ի գործ» ծրագրով ընտանիքի հետ վերադարձել է Հայաստան:
Նշենք, որ Նորամուծության և ձեռներեցության կենտրոնում Էկոնոմիկայի նախարարը և Սփյուռքի գործերով գլխավոր հանձնակատարը կենտրոնի աշխատակիցներին ներկայացրին նորանշանակ տնօրեն Հայկ Մարգարյանին:
«Սփյուռքը հասկանում է, որ հիմա շատ կարևոր պահ է, որ գանք հայրենիք և օգտակար լինենք հայրենիքին՝ այս կարևոր ընթացքի մեջ: Սփյուռքի լավագույն մասնագետները պետք է վերադառնան և օգնեն ոտքի կանգնեցնել Հայաստանը: Եվ շատ լավ սփյուռքահայ մասնագետներ կան, որոնց ծրագրերն արդեն ընթացքի մեջ են, իրականացվում են»,- նշեց Մարգարյանը:
Նրա խոսքով՝ Նորամուծության և ձեռներեցության կենտրոնը նպատակ ունի կառավարության և էկոնոմիկայի նախարարության առաջարկով կենտրոնանալ նոր տեխնոլոգիաների ստեղծման, ներդրումների ներգրավման և բիզնեսի վրա. «Կաշխատենք և՛ ներդրողների, և՛ գիտնականների, և՛ բիզնես ոլորտի հետ»:
Հայկ Մարգարյանը կարևորեց Սփյուռքի և հայաստանաբնակ հայության համախմբումը հայրենիքի զարգացման նպատակի շուրջ:
Մանրամասն՝ տեսանյութում: