Վարչապետ Նիկոլ Փաշինյանը Հանրապետության հրապարակում տեղի ունեցած հանրահավաքի ընթացքում վերստին հայտարարել է արտահերթ ընտրության առաջարկի մասին, դիմելով խորհրդարանական և արտախորհրդարանական ընդդիմությանն ու նշելով, թե իշխանությունը տալիս է այդ հարցի շուրջ համաձայնության գալու ևս մի հնարավորություն: Նիկոլ Փաշինյանը հայտարարել է, որ այդպիսով փորձում է հերքել որոշ ընդդիմադիրների այն հայտարարությունները, թե իշխանությունը արտահերթ ընտրության պատրաստ չէ և դրա մասին խոսել էր այն հաշվարկով և ակնկալիքով, որ ընդդիմությունը մերժելու է: Նիկոլ Փաշինյանը հայտարարել է, որ այդ գաղափարի մասին հայտարարում է ևս մեկ անգամ:
Կընդունվի՞ նրա այդ գաղափարը խորհրդարանական և արտախորհրդարանական ուժերի տիրույթում: Արտահերթ ընտրության մեխանիզմի կիրառումը, ինչպես առիթ ենք ունեցել ասելու, կարող է քաղաքական ճգնաժամի հանգուցալուծման էֆեկտիվ միջոց լինի այն դեպքում, երբ դրա շուրջ համաձայնության են գալիս և այդ միջոցի կիրառումն ընդունում են բոլորը, պայմանավորվելով ընդունել նաև դրա ընթացքում արձանագրված արդյունքը: Հատկանշական է այն, որ վարչապետ Փաշինյանը խորհրդարանի արտահերթ ընտրության հարցը ևս մեկ անգամ օրակարգ է բերում Գլխավոր շտաբի հայտարարությունից հետո ստեղծված բազմիմաստ իրավիճակում: Բազմիմաստ, որովհետև այստեղ կա հետաքրքիր մի նրբերանգ:
Նիկոլ Փաշինյանը արտահերթ ընտրության պատրաստակամության մասին հայտարարում է «Իսկանդեր»-ի մասին հայտնի պարզաբանումն անելուց հետո, որին հաջորդեց Կրեմլի արձագանքը: Պուտինի խոսնակ Պեսկովը նշել էր, որ Մոսկվան բավարարված է Երևանի այդ հայտարարությունից:
Ասել կուզի, Երևան-Մոսկվա խնդիրը հարթված է, Ռուսաստանի «պատիվը» փրկված, ըստ այդմ՝ հարց է առաջանում, թե ինչ է ստացել Երևանը «մեղքն իր վրա վերցնելու» համար: Միևնույն ժամանակ այդ ֆոնին հատկանշական է, որ հանրահավաքում Նիկոլ Փաշինյանը Գլխավոր շտաբի հայտարարության պատասխանատվությունը դրեց Սերժ Սարգսյանի վրա՝ ասելով, որ Օնիկ Գասպարյանը գործել է հենց նրա հորդորով: Փաշինյանը ևս մեկ անգամ կրկնեց, որ Գասպարյանը պետք է հեռանա, իսկ մնացյալ գեներալակազմը կարող է շարունակել ծառայությունը: Ահա այդ ֆոնին հատկանշական է արտահերթ ընտրության օրակարգի կրկնությունը, որին, ի դեպ, նկատենք՝ օրեր առաջ կողմ էր արտահայտվել երկրորդ նախագահ Ռոբերտ Քոչարյանը: Ի դեպ, Ռոբերտ Քոչարյանը փետրվարի սկզբին Մոսկվա այցի ընթացքում նաև հայտարարել էր, որ հավակնում է երկրորդ բևեռ դառնալուն: Արդյո՞ք Ռուսաստանը պնդում է Ռոբերտ Քոչարյանին այդ հնարավորությունը տալու հարցը՝ այդ պայմանով բավարարված լինելով և աջակցելով Երևանին, այսպես ասած, ռազմական հեղաշրջումը հետ շրջելու հարցում: Նախօրեին տեղի է ունեցել նաև նախագահ Արմեն Սարգսյանի և Նիկոլ Փաշինյանի հանդիպումը: Ինչպես հայտնի է, Օնիկ Գասպարյանի պաշտոնանկության հարցը Նիկոլ Փաշինյանը վերստին ուղարկել էր Արմեն Սարգսյանին: Փոխվելո՞ւ է նախագահի մոտեցումը իրավիճակի փոփոխության նախնական նշանների պայմաններում:
