«Պետք է ասել, որ երկխոսությունը շատ արդյունավետ տարրեր է պարունակում, քննարկումները կոնստրուկտիվ հունով են գնում, ինչը թույլ է տալիս ենթադրել, որ գերակա նպատակների հաղթահարման ուղղությամբ որոշակի քայլեր են կատարվել, տիրում է աշխատանքային բարյացակամ մթնոլորտ, և պետք ամեն ինչ անել այդ մթնոլորտի պահպանման համար». այս մասին այսօր հրավիրված մամուլի ասուլիսում ասաց ԱԺ ՀՀԿ խմբակցության պատգամավոր Գագիկ Մինասյանը՝ անդրադառնալով ՀԱԿ – իշխանություն երկխոսությանը: Նրա խոսքով՝ նախորդ հանդիպմանը ՀԱԿ գործընկերները ներկայացրել են տրանսպորտային միջոցների խափանման և ՀԱԿ-ի ակտիվիստ թռուցիկ բաժանողներին խոչընդոտելու փաստեր, իրենք էլ խոստացել են անցկացնել ծառայողական քննություն և դրանց արդյունքների մասին ներկայացնել տեղեկատվություն:
Հանդիպման կարևոր հարցերից մեկը, ըստ Գագիկ Մինասյանի, աշխատակարգի խնդիրն էր, քանի որ ՀԱԿ ներկայացուցիչները առաջարկել են հանդիպել ամեն օր՝ ներառյալ շաբաթ և կիրակի օրերը: «Առաջարկի մեջ որոշակի երանգներ կան, չեմ ուզում ասել՝ ամբոխավարական, բայց խոստացել ենք քննարկել»,- ասաց նա՝ տեղեկացնելով, որ արդյունքում որոշվել է հանդիպումները կազմակերպել շաբաթը երկու անգամ՝ երեքշաբթի և ուրբաթ, ժամը 12.00-ին: Նրա ասելով՝ հանդիպումները կշարունակվեն այնքան, մինչև չտրվեն ՀԱԿ ներկայացուցիչների հարցերի պատասխանները: Նախորդ հանդիպման կարևոր հարցերից Գագիկ Մինասյանը նշեց այն, որ քննարկման առարկա է դարձել, թե, ի վերջո, ինչը պետք քննարկել, քանի որ հուլիսի 26-ին ՀԱԿ-ի ներկայացրած փաստաթուղթը բաղկացած է եղել երեք հատվածից՝ ճգնաժամի նկարագիր, դրանից դուրս գալու լուծումներ, և ինչպիսի իրավիճակ պետք լինի արտահերթ նախագահական կամ խորհրդարանական ընտրություններից հետո:
Նա մտահոգիչ համարեց այն, որ ՀԱԿ-ը գուցե ընտրի քննարկումներից խուսափելու տարբերակը, և ներկայացրեց ՀՀԿ-ի տեսակետը, այն է՝ քննարկել ցանկացած հարց, սակայն ոչ իրական համարեց արտահերթ նախագահական ընտրությունների անցկացումը, քանի որ իրավիճակը ճգնաժամային չէ: «Վիճակը ճգնաժամային չէ՝ ինչպես ներկայացնում են մեր գործընկերները: Պետք է համոզել, որ դա չի համապատասխանում իրականությանը։ Չեմ կարծում, թե նրանց հնարավոր չէ համոզել»:
Անդրադառնալով ՀԱԿ-ի՝ մինչև սեպտեմբեր երկխոսելու ժամկետին՝ Գագիկ Մինասյանը նշեց, որ եթե քննարկումները կառուցողական ընթանան, ապա ավելորդ կլինի խոսել ժամկետների մասին: «Մինչև սեպտեմբեր… դպրո՞ց եմ գնալու, ի՞նչ է»,- կատակեց Մինասյանը։
