Գիտնականները կատարել են մումիայի համակարգչային տոմոգրաֆիա։
Հետազոտության հեղինակները հետազոտել են մումիֆիկացված մարմինը՝ օգտագործելով նորացված տեխնոլոգիաներ:
Մումիայի մնացորդները, որոնք այժմ գտնվում են Սիդնեյի համալսարանում, պատկանում է ոչ թե ազնվական կնոջ, որի անունը նշված է դագաղի կափարիչի վրա, այլ բոլորովին այլ մարդու: Այս եզրակացությանն են հանգել ավստրալացի գիտնականները՝ իրականացնելով մումիայի և դագաղի համակարգչային տոմոգրաֆիա (CT) և ռադիոածխածնային քննություն: Այս մասին գրում է Mail Online-ը:
Մումիֆիկացված կնոջ մարմինը թվագրվում է մ.թ.ա. 1200-ին, իսկ մումիայի դագաղը պատրաստվել է մ.թ.ա. 1000-ին։
Գիտնականները ենթադրում են, որ մարմինը հնարավոր է 19-րդ դարի ինչ-որ պահի եգիպտացի վաճառականը դրել է դատարկ դագաղի մեջ, որը դրանից անմիջապես հետո գնել է անգլիացի հետախույզ սըր Չարլզ Նիքոլսոնը, որը մումիֆիկացված մարմինը, դագաղով ու կափարիչով ձեռք է բերել 1856-1867 թվականներին Եգիպտոս ճանապարհորդության ընթացքում: 1860 թվականին սըր Նիքոլսոնը այն նվիրել է Սիդնեյի համալսարանին:
Դագաղի կափարիչին գրված է որ դա Մերուա անունով մի կին է։
Ատամների և կմախքի նոր հետազոտման միջոցով հեղինակները պարզել են, որ մումիֆիկացված անձը 26-ից 35 տարեկան է: Մարմնի զննումը չի հայտնաբերել արտաքին սեռական օրգաններ, իսկ ներքին վերարտադրողական օրգանները հեռացվել են մումիացման ժամանակ: Այնուամենայնիվ, սեռի որոշման երկրորդական հատկությունները, ներառյալ ազդրերի ոսկորները, ծնոտը և գանգը, ենթադրում են, որ մումիան կին է, ինչը կասկածի տակ է դնում 2005-ի ուսումնասիրության արդյունքները, որը ԴՆԹ քննությամբ մումիան տղամարդ է ճանաչել:
Մումիֆիկացված մարմինը և դագաղը ներկայումս գտնվում են նոր Chow Chak Wing թանգարանի Նիկոլսոն հավաքածուում, որը հասարակությանը ներկայացվել է անցյալ տարվա նոյեմբերին՝ Սիդնեյի համալսարանի գլխավոր մասնաշենքում:
